Астана. 12 маусым. ИНТЕРФАКС-ҚАЗАҚСТАН – Қазақстан мен Еуропалық одақ делегациялары визаларды беру рәсімдерін жеңілдету туралы келісім мен реадмиссия туралы келісім жобалары бойынша келіссөздердің кезекті кезеңін өткізді. Бұл туралы Қазақстан Республикасы Сыртқы істер министрлігінің баспасөз қызметі хабарлады.
Келіссөздер барысында тараптар болашақ келісімдердің негізгі ережелері бойынша ұстанымдарын жақындатуға қатысты нақты мәселелерді талқылауды жалғастырды. Хабарламада атап өтілгендей, Қазақстан азаматтары үшін визалық рәсімдерді жетілдіру мәселелеріне ерекше назар аударылды.
Атап айтқанда, виза алуға берілген өтініштерді қарау мерзімдері, көп мәртелік визаларды беру тәртібі, растайтын құжаттар тізбесін оңтайландыру және адамдар арасындағы байланыстарды дамытуға бағытталған өзге де практикалық мәселелер қарастырылды.
«Келіссөздер қорытындысы бойынша тараптар екі келісімнің де көптеген ережелері бойынша елеулі ілгерілеуге қол жеткізілгенін атап өтіп, жұмысты жалғастыруға дайын екендерін растады», – делінген СІМ хабарламасында.
Қол жеткізілген нәтижелер тараптар арасындағы өзара түсіністіктің жоғары деңгейін көрсетіп, азаматтардың ұтқырлығын арттыруға, сондай-ақ Қазақстан мен Еуропалық одақ арасындағы іскерлік, білім беру, ғылыми және гуманитарлық байланыстарды кеңейтуге берік негіз қалыптастырады.
