Астана. 12 маусым. ИНТЕРФАКС-ҚАЗАҚСТАН – Қасым-Жомарт Тоқаев Қырғызстан Жогорку Кеңешінің төрағасы Марлен Маматалиевпен кездесіп, парламентаралық байланыстарды дамыту және жоғары деңгейде қол жеткізілген уағдаластықтарды заңнамалық тұрғыдан қамтамасыз ету мәселелерін талқылады. Бұл туралы Мемлекет басшысының баспасөз қызметі хабарлады.
«Екі елде жүзеге асырылып жатқан жүйелі әлеуметтік-экономикалық реформалар жөнінде мазмұнды әрі нақты пікір алмасу өтті. Тараптар Қазақстан мен Қырғызстан арасындағы стратегиялық әріптестік пен одақтастық қатынастарды жан-жақты дамытуға бейілді екенін растады», – делінген жұма күні таратылған хабарламада.
Кездесу барысында Тоқаев Маматалиевтің Қазақстанға жасаған алғашқы ресми сапарының екіжақты қарым-қатынастарды нығайтудағы ерекше маңызын атап өтті.
«Сіздің сапарыңыздың маңызы зор. Ол екіжақты ынтымақтастыққа жаңа серпін беретініне сенімдімін. Біздің мемлекеттер арасында ешқандай қайшылықтар мен келіспеушіліктер жоқ. (…) Біз бауырлас халықтар ретінде тату көршілік қатынастарымызды одан әрі нығайта береміз», – деді Қазақстан Президенті.
Сонымен қатар Мемлекет басшысы Қырғызстан экономикасының жоғары қарқынмен дамып келе жатқанын атап өтіп, елді БҰҰ Қауіпсіздік Кеңесінің тұрақты емес мүшесі болып сайлануымен тағы да құттықтады.
