АСТАНА. 29 қыркүйек. ИНТЕРФАКС-ҚАЗАҚСТАН – Астана мен Рим өзара сауда көлемін арттыру және екі елдің іскер топтары арасындағы байланыстарды белсендіру жөнінде уағдаластыққа қол жеткізді, деп хабарлайды Қазақстан Президентінің баспасөз қызметі.
Мемлекет басшысының баспасөз қызметінің мәліметінше, Қазақстан Президенті Қасым-Жомарт Тоқаев дүйсенбі күні Астанада Италия Президенті Серджо Маттарелламен өткен кездесуде өткен жылы Тоқаевтың Италияға жасаған ресми сапары барысында қол жеткізілген келісімдердің орындалу барысын талқылады. Сонымен қатар, Италия Президентінің Астанаға ресми сапары аясындағы бұл кездесу жаңа ынтымақтастық бағыттарын айқындауға мүмкіндік берді.
«Өзара сауда көлемін одан әрі ұлғайту жөнінде келісімге келдік. Тауар номенклатурасын кеңейту мақсатында іскерлік байланыстарды жандандыру – маңызды міндет ретінде белгіленді», – деді Қасым-Жомарт Тоқаев.
Қазақстан Президентінің айтуынша, тараптар өзара мүддеге сай келетін жаңа инвестициялық жобаларды талқылауға кіріскен.
«Энергетика, ауыл шаруашылығы, машина жасау, жеңіл және тамақ өнеркәсібі салаларына ерекше назар аударылды. Бұл бағыттағы жұмысты Үкіметаралық экономикалық ынтымақтастық жөніндегі комиссия үйлестіруі қажет деп санаймыз», – деді Мемлекет басшысы.
Сонымен қатар, Қасым-Жомарт Тоқаев пен Серджо Маттарелла көлік-логистика саласындағы ынтымақтастықты дамыту мәселелерін, соның ішінде халықаралық көлік дәліздерінің әлеуетін арттыру, оның ішінде Транскаспий бағытын кеңейту мүмкіндіктерін талқылады. Сондай-ақ логистикалық инфрақұрылым мен өңдеу өнеркәсібі салаларындағы ықпалдастық мүмкіндіктері қаралды.
Қазіргі таңда Қазақстанда шамамен 250 италиялық компания жұмыс істейді. 2005 жылдан бері Италия Қазақстан экономикасына 7,6 млрд АҚШ долларынан астам инвестиция құйған.
