Астана. 29 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев дүйсенбі күні жаңадан тағайындалған Вице-премьер – Жасанды интеллект және цифрлық даму министрі Жаслан Мадиевті қабылдады, деп хабарлайды Мемлекет басшысының баспасөз қызметі.
Кездесу барысында Мемлекет басшысы ұлттық цифрлық инфрақұрылымды одан әрі дамыту, жасанды интеллектті экономиканың және әлеуметтік саланың негізгі секторларына енгізу, сондай-ақ азаматтар мен бизнеске көрсетілетін мемлекеттік цифрлық қызметтердің сапасын арттыру жөнінде бірқатар нақты тапсырма берді.
Баспасөз қызметінің мәліметінше, Президент жасанды интеллект және цифрлық технологиялар саласында білікті мамандар даярлау мәселесіне ерекше назар аударды.
«Мемлекет басшысы жоғары технологиялар саласында халықаралық ынтымақтастықты кеңейту мен Қазақстанның өңірлік цифрлық хаб ретіндегі орнын нығайту қажеттігін атап өтті», – делінген ресми хабарламада.
Сондай-ақ Жаслан Мадиевке Президенттің 8 қыркүйекте жариялаған Жолдауында белгіленген басым мақсат – Қазақстанды үш жыл ішінде толыққанды цифрлық мемлекетке айналдыру жөніндегі стратегиялық міндетті іске асыру тапсырылды.
Еске сала кетейік, бұған дейін Мемлекет басшысы Мадиевті жаңа құрылған Жасанды интеллект және цифрлық даму министрлігінің басшысы етіп тағайындау туралы жарлыққа қол қойған болатын. Бұған дейін ол Цифрлық даму, инновациялар және аэроғарыш өнеркәсібі министрлігін басқарған. Жаңа ведомство осы министрліктің негізінде құрылды.
