Астана. 9 қазан. ИНТЕРФАКС-ҚАЗАҚСТАН – Бейсенбі күні өткен Сенаттың жалпы отырысында Қазақстан Республикасы Парламентінің жоғарғы палатасы Мәжіліс мақұлдаған «Қазақстан Республикасы Үкіметі мен Катар Мемлекетінің Үкіметі арасындағы Қазақстан Республикасынан Катар Мемлекетіне жұмысшыларды жұмыспен қамтуды реттеу туралы келісімді ратификациялау туралы» заң жобасын мақұлдады.
Осылайша, заң Парламент тарапынан толық қабылданды және қол қою үшін Президентке жолданатын болады.
Келісім Қазақстан азаматтарын Катарда еңбекке орналастыруды құқықтық тұрғыдан реттеуді көздейді. Атап айтқанда, қазақстандық азаматтарды іріктеу, жұмысқа қабылдау және олардың еңбек ету кезіндегі құқықтарын айқындау рәсімдері белгіленеді. Келісімге қосымша ретінде жұмысшыларды жалдау бойынша үлгілік еңбек шарты бекітіледі.
Үлгілік шартта жұмыс берушінің қызметкерге тұрғын үй беру немесе тұрғын үй жәрдемақысын төлеу, жұмыс орнына дейін және кері тегін тасымалдау немесе көлік шығындарын өтеу, медициналық қызмет көрсету және еңбек шарттары аясында жыл сайынғы демалысты қамтамасыз ету сияқты міндеттері қарастырылған. Бұл талаптар Катар заңнамасына сәйкес жүзеге асады. Жұмыс беруші бұл шарттың мазмұнына өзгеріс енгізуге құқылы емес.
Келісімнің орындалуын үйлестіру мақсатында Қазақстан Республикасының Еңбек және халықты әлеуметтік қорғау министрлігі мен Катар Еңбек министрлігінің өкілдерінен бірлескен комитет құрылады.
Бұған дейін Қазақстанның еңбек және халықты әлеуметтік қорғау министрі Светлана Жақыпова қыркүйек айындағы дерек бойынша Катарда шамамен 800 қазақстандық жұмыс істеп жатқанын, олардың көпшілігі мұнай-газ саласы мен қызмет көрсету секторында еңбек ететінін хабарлаған болатын.
