Астана. 25 маусым. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күні өткен жалпы отырыста «Психологиялық қызмет туралы» заңды мақұлдады.
Бұған дейін хабарланғандай, құжат депутаттардың бастамасымен әзірленген және елімізде психологиялық көмек көрсету саласының құқықтық негіздерін алғаш рет айқындайды.
Мәжіліс депутаты Айна Мысырәлімованың айтуынша, осы уақытқа дейін Қазақстандағы психологиялық қызмет көрсету нарығы заңнамалық тұрғыдан реттелмеген. Соның салдарынан кез келген адам өзін психолог ретінде таныстыра алатын жағдай қалыптасқан.
Заңда алғаш рет психолог ұғымына нақты анықтама беріліп, психологиялық қызметпен кімдердің айналыса алатыны белгіленген. Сондай-ақ мамандардың біліктілігі мен біліміне қойылатын талаптар нақтыланған.
Құжаттың негізгі жаңалықтарының бірі – психологтардың бірыңғай мемлекеттік тізілімін құру. Енді кәсіби қызметпен айналысу үшін осы тізілімге енгізілу міндетті талап болады.
Сонымен қатар заңда кәсіби құпияны сақтау, этикалық нормаларды ұстану және манипуляциялық әдістерді қолдануға тыйым салу қағидаттары бекітілген.
Құжатта психологтардың және психологиялық көмек алушылардың құқықтары мен міндеттері де айқындалған.
Заңға сәйкес, психолог жұмыс барысында алған ақпараттың құпиялылығын сақтауға және қызметін тек көмек алушының мүддесін басшылыққа ала отырып жүзеге асыруға міндетті.
Депутаттың айтуынша, заң психологиялық және медициналық қызметтің ара-жігін нақты ажыратады. Осыған байланысты психологтарға дәрі-дәрмекпен ем жүргізуге тыйым салынады. Бұл халықаралық тәжірибеге сай келеді және азаматтардың қауіпсіздігін арттыруға бағытталған.
Сондай-ақ психологиялық көмек көрсету барысында адамның санасына әсер ететін психоактивті заттар мен психоактивті әдістерді қолдануға да тыйым енгізіледі.
Заң Мемлекет басшысының қол қоюына жолданды.
