Астана. 4 маусым. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күнгі жалпы отырыста Салық кодексіне өзгерістер енгізу туралы заңды екі оқылымда қарап, мақұлдады.
Заң бұған дейін Мәжілісте қабылданған болатын. Осылайша, құжат Парламент тарапынан тұтастай қабылданды деп есептеледі және Мемлекет басшысының қол қоюына жолданады.
Сенаттың Қаржы және бюджет комитетінің қорытындысында атап өтілгендей, заң жаңа Конституцияның нормаларын іске асыруға бағытталған.
Құжатта бір палаталы парламент – Құрылтай құруға, Қазақстан Халық кеңесін қалыптастыруға, сондай-ақ азаматтардың Конституциялық сотқа жүгінуі кезінде мемлекеттік бажды алып тастауға байланысты өзгерістер қарастырылған.
Түзетулер Салық кодексінің мәнін өзгертпейді. Құжатта техникалық сипаттағы нақтылаулар енгізіліп, жекелеген нормалардың редакциясы біріздендірілген.
