Астана. 29 маусым. ИНТЕРФАКС-ҚАЗАҚСТАН – Қазақстан парламенті сенатының депутаттары дүйсенбі күні өткен жалпы отырыста «Топырақты қорғау туралы» заңды және топырақты қорғау, жер қатынастары мен агроөнеркәсіптік кешен мәселелері бойынша заңнамалық актілерге енгізілетін ілеспе түзетулерді мақұлдады.
Бұған дейін бұл заңдар мәжілісте қабылданған болатын. Осылайша олар парламентте түпкілікті қабылданып, мемлекет басшысының қол қоюына жіберіледі.
Құжаттар Қазақстанның топырақ ресурстарын қорғаудың құқықтық негізін қалыптастыруға бағытталған.
Заңда «топырақ» ұғымы мен оның негізгі көрсеткіштері бекітіледі, топырақты ұтымды пайдалану және қорғау жөніндегі негізгі талаптар айқындалады, жергілікті мемлекеттік органдардың функциялары нақтыланады, ғылыми зерттеулердің басым бағыттары белгіленіп, халықаралық ынтымақтастықты дамыту көзделеді.
Ауыл шаруашылығы мақсатындағы жерлерді беру кезінде олардың топырақ паспорты міндетті түрде әзірленетін болады. Онда жердің бонитет балы, қарашірік мөлшері, азот, фосфор және калий деңгейі, тұздану дәрежесі, қышқылдық деңгейі және топырақтың басқа да сипаттамалары көрсетіледі.
Сондай-ақ топырақтың қасиеттерін қалпына келтіруге бағытталған міндетті шаралар енгізіледі. Атап айтқанда, ауыл шаруашылығы жерлерінде ауыспалы егіс жүйесін енгізу, қар тоқтату және мульчалау әдістерін қолдану, сондай-ақ ғылыми негізделген жүйеге сәйкес органикалық және минералдық тыңайтқыштарды пайдалану қарастырылған.
Бұдан бөлек, топырақтың жай-күйіне қарай жекелеген ауыл шаруашылығы дақылдарын өсіруге шектеулер енгізіледі.
Сонымен қатар топырақты су басудан, батпақтанудан, қайта тұзданудан, тозудан, құрғап кетуден және тығыздалудан қорғауға қойылатын талаптар, сондай-ақ тозған жерлерді қалпына келтіру шаралары заң жүзінде бекітіледі.
