Астана. 3 ақпан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Пәкістан Ислам Республикасына мемлекеттік сапармен барды. Бұл туралы сейсенбі күні қазақстандық көшбасшының баспасөз қызметі хабарлады.
Баспасөз қызметінің мәліметінше, Пәкістанның әуе кеңістігінде Қазақстан Президентінің ұшағын елдің Әскери-әуе күштерінің жойғыш ұшақтары ілесіп жүрді.
Исламабад әуежайында Қазақстан Президентін Пәкістан Президенті Асиф Али Зардари мен Премьер-министр Шахбаз Шариф қарсы алды.
«Құрметті қонақтың келуіне орай елордалық әуежайда құрмет қарауылының ротасы сап түзеп, артиллериялық қарулардан 21 салтанатты дүркін атылды. Қасым-Жомарт Тоқаевты сондай-ақ Қазақстан мен Пәкістанның жалаушаларын ұстаған балалар тобы қарсы алды», – делінген хабарламада.
Баспасөз қызметінің ақпаратынша, жоғары деңгейдегі келіссөздер сәрсенбі күні өтеді.
Бұған дейін Мемлекет басшысының баспасөз қызметі Қасым-Жомарт Тоқаевтың Пәкістанға мемлекеттік сапары 3–4 ақпан күндері өтетінін хабарлаған болатын. Сапар аясында Премьер-министр Шахбаз Шарифпен және Президент Асиф Али Зардариімен келіссөздер жүргізіліп, саяси, сауда-экономикалық және мәдени-гуманитарлық ынтымақтастықты нығайту перспективалары талқыланады. Сонымен қатар Қазақстан–Пәкістан бизнес-форумының жұмысына Президенттің қатысуы жоспарланған.
