Дели. 3 ақпан. ИНТЕРФАКС – Үндістан мен АҚШ арасындағы сауда келісімі бойынша келіссөздер соңғы кезеңге жеткенімен, әзірге толық аяқталған жоқ. Бұл туралы сейсенбі күні Үндістанның сауда және өнеркәсіп министрі Пиюш Гоял мәлімдеді.
«Біз әлі де келіссөздердің қорытынды сатысындамыз. Келісім бойынша түпкілікті ортақ түсінікке қол жеткізіліп, техникалық жайттар пысықталғаннан кейін бірлескен мәлімдеме жариялаймыз», – деп келтіреді Hindustan Times министрдің сөзін.
Гоялдың айтуынша, бұл келісім Үндістан азаматтарының мақтанышына айналады, ал экономиканың негізгі салалары, соның ішінде ауыл шаруашылығы мен сүт өнеркәсібі тиісті деңгейде қорғалады. Ол Үндістан премьер-министрі Нарендра Модидің АҚШ президенті Дональд Трамппен достық қарым-қатынасын пайдаланып, келісімді дәл қазір және өңірдегі өзге елдермен салыстырғанда барынша тиімді шарттармен жасасуға қол жеткізгенін атап өтті.
Сонымен қатар министр Үндістан парламентінің төменгі палатасындағы оппозиция жетекшісі Рахул Гандиді сынға алып, оның Модиді АҚШ-пен жасалған келісім арқылы ел мүддесіне нұқсан келтірді деп айыптағанын орынсыз деп бағалады.
Бұған дейін Дональд Трамп Нарендра Модимен сауда келісіміне қол жеткізілгенін, оның аясында, атап айтқанда, кедендік баж мөлшерлемелерін 25%-дан 18%-ға дейін төмендету көзделгенін мәлімдеген болатын.
Алайда Hindustan Times басылымының атап өтуінше, үндістандық оппозиция жетекшілері Үндістан 18% көлемінде баж төлеп, ал америкалық тауарларға баж салынбайтын жағдайда, бұл келісімдердің әділдігіне күмән келтіріп отыр. Сондай-ақ олар Трамп айтқандай, Үндістан АҚШ-тан 500 млрд доллар көлемінде тауар сатып алуға міндеттенді деген мәлімдемеге де күмән білдіруде, себебі қазіргі кезде АҚШ-тан жыл сайынғы импорт көлемі шамамен 45 млрд долларды ғана құрайды.
Сонымен бірге Трамптың сөздеріне қарамастан, Үндістан билігі Ресейден мұнай сатып алуды тоқтататыны жөнінде ресми мәлімдеме жасаған жоқ.
Ресей президентінің баспасөз хатшысы Дмитрий Песков сейсенбі күні Мәскеудің Үндістан тарапынан Ресей мұнайын сатып алуды тоқтату жоспарлары туралы ешқандай мәлімдеме естімегенін айтты. «Бұл жөнінде Делиден әзірге ешқандай мәлімдеме болған жоқ», – деді Песков журналистердің Үндістанның ресейлік мұнайдан бас тартқаны туралы сұрағына жауап бере отырып.
