Астана. 23 шілде. ИНТЕРФАКС — Қазақстан Үкіметі қолданыстағы KazSat-3 ғарыш аппаратын алмастыратын KazSat-3R байланыс спутнигін жасауға Үкімет резервінен 10,4 млрд теңге бөлді. Бұл туралы Министрлер кабинетінің баспасөз қызметі хабарлады.
Тиісті қаулыға Қазақстанның Премьер-министрі Олжас Бектенов қол қойды.
Үкіметтің мәліметінше, бөлінген қаражат KazSat-3R байланыс спутнигін әзірлеуге жұмсалады. Жаңа аппарат 2029 жылы пайдалану мерзімі аяқталатын KazSat-3 спутнигінің орнын басып, ұлттық спутниктік байланыс жүйесінің үздіксіз жұмысын қамтамасыз етуге мүмкіндік береді.
Кабинет өкілдерінің айтуынша, жобаның іске асырылуы спутниктік байланыс пен телерадио хабарларын тарату желілерінің тұрақты жұмысын қамтамасыз етуге, халқы сирек қоныстанған және шалғай елді мекендерде интернетке қолжетімділікті кеңейтуге, сондай-ақ ақпараттық қауіпсіздікті күшейтіп, елдің технологиялық тәуелсіздігін нығайтуға ықпал етеді.
Қазіргі таңда KazSat спутниктік байланыс жүйесінің мүмкіндіктерін 19 байланыс операторы мен мемлекеттік органдар пайдаланып отыр. Жүйеге телехабар тарату қызметін тұтынатын 2 миллионнан астам абонент қосылған.
23 шілдедегі ресми бағам бойынша, 1 АҚШ доллары – 467,65 теңге.
