Астана. 3 наурыз. ИНТЕРФАКС-ҚАЗАҚСТАН – Биыл Қазақстанда алты жаңа ақылы жол учаскесін пайдалануға беру жоспарланып отыр. Бұл туралы Үкімет отырысында «ҚазАвтоЖол» ҰК» АҚ басқарма төрағасы Дархан Иманашев мәлімдеді.
«Биыл алты жаңа учаскені іске қосу жоспарланып отыр», – деді ол.
Көлік министрлігінің баспасөз қызметінің мәліметінше, ақылы негізге көшірілетін жолдар мыналар: Қарағанды – Балқаш – Бурылбайтал (554,6 км), Бурылбайтал – Құрты (226,4 км), Ақтөбе – Қандыағаш – Мақат (89 км), Талдықорған – Өскемен (773 км), Атырау – Астрахань (277 км) және Мерке – Шу – Бурылбайтал (78 км).
Компания басшысы жол жамылғысында ақаулар анықталған учаскелерде жолақы алуды уақытша тоқтату нормасы енгізілгенін еске салды. Қазіргі уақытта ақаулардың тіркелген көлемі 1,1 млн шаршы метрді құрайды (жалпы ұзындығы 477 км болатын 14 учаске). Олар жол-құрылыс маусымы басталғаннан кейін жөнделе бастайды.
Сондай-ақ жол пайдаланушылардың өтініштері негізінде ақылы жолдарда жолақы төлеу мерзімін 7 күннен 30 күнге дейін ұзарту қарастырылған. Тиісті түзетулер уәкілетті органдардың келісу сатысында тұр.
Дархан Иманашевтің айтуынша, 2025 жылдың қорытындысы бойынша ақылы жолдардан 87 млрд теңге жиналған (2024 жылы – 48 млрд теңге). Бұл қаражат толықтай ақылы жолдарды күтіп ұстауға бағытталған. Түскен табыс есебінен 1,5 мың дана арнайы техника мен жабдық сатып алынып, 354 мың шаршы метр жол жамылғысы жөнделген, сондай-ақ 340 мың текше метр көктайғаққа қарсы материал пайдаланылған.
Көлік министрлігінің дерегінше, бүгінде Қазақстанда жалпы ұзындығы 4,9 мың шақырымды құрайтын 26 ақылы жол учаскесі жұмыс істейді.
3 наурыздағы ресми бағам – 1 АҚШ доллары үшін 502,6 теңге.
