Астана. 18 наурыз. ИНТЕРФАКС-ҚАЗАҚСТАН – Қазақстанда дербес деректерді қорғауды күшейту мақсатында Әкімшілік құқық бұзушылық туралы кодекске, Қылмыстық кодекске, сондай-ақ дербес деректер мен киберқауіпсіздік туралы заңдарға өзгерістер енгізу жоспарланып отыр. Бұл туралы премьер-министрдің орынбасары – жасанды интеллект және цифрлық даму министрі Жаслан Мадиев мәлімдеді.
Оның айтуынша, жұмыс екі негізгі бағыт бойынша жүргізіледі: ұйымдастырушылық-техникалық шаралар және операторлардың жауапкершілігін арттыру.
«Дербес деректерді қорғаудың заманауи тәсілдерін, соның ішінде деректерді хэштеу мен маскалауды енгізу көзделген. Бұл рұқсатсыз қол жеткізу жағдайында деректердің жария болу тәуекелін азайтуға мүмкіндік береді», – деді Мадиев сәрсенбі күні үкімет отырысында.
Сондай-ақ мемлекеттік дерекқорлардан мәліметтерді жаппай көшіруге шектеу қою жоспарланып отыр. Негізгі басымдық ақпараттық жүйелерді өзара интеграциялауға беріледі, ал деректерді сыртқа шығару заңмен нақты белгіленген жекелеген жағдайларды қоспағанда шектеледі.
Бұдан бөлек, дербес деректер операторларының жіктелген тізілімі және сенімді шетелдік алушылар тізілімі құрылмақ.
«Кибермәдениетті арттыруға ерекше назар аударылады», – деп атап өтті вице-премьер.
Ол сондай-ақ операторлар дербес деректердің таралуы немесе заңсыз қол жеткізу фактілері туралы уәкілетті органға да, азаматтардың өздеріне де хабарлауға міндетті болатынын, сондай-ақ деректерді өңдеуді бастау туралы уәкілетті органды алдын ала хабардар етуі тиіс екенін айтты.
«Дербес деректердің жаппай таралуы үшін қылмыстық жауапкершілік енгізу және әкімшілік айыппұлдардың жоғарғы шегін 5000 АЕК-ке дейін ұлғайту мәселесі қарастырылып жатыр», – деп түйіндеді Мадиев.
Бұған дейін Қазақстан президенті Қасым-Жомарт Тоқаев дербес деректердің жиі таралуына байланысты оларды қорғау жүйесін күшейтуді және киберқылмыспен күрес тәсілдерін қайта қарауды тапсырған болатын.
2026 жылғы 1 қаңтардан бастап 1 АЕК мөлшері 4325 теңгені құрайды.
