Астана. 18 наурыз. ИНТЕРФАКС-ҚАЗАҚСТАН – Қазақстан парламенті Мәжілісі сәрсенбі күнгі жалпы отырысында «Мемлекеттік қызмет туралы» заң жобасын бірінші оқылымда мақұлдады.
Мемлекеттік қызмет істері агенттігінің төрағасы Дархан Жазықбайдың айтуынша, құжатта мемлекеттік қызметтің тартымдылығын арттыруға, білікті кадрларды тарту және ұстап қалуға бағытталған бірқатар шара көзделген.
«Мансаптық өсудің жаңа тұжырымдамасы енгізіледі. Бұл тәсіл мемлекеттік қызметшілердің жүйелі дамуына ықпал етіп, нәтижесінде олардың жалақысының артуына әсер етеді», – деді Жазықбай.
Оның айтуынша, заң жобасы бір лауазым шеңберінде кәсіби дамуды реттеуді және еңбекақыны кемінде үш жылда бір рет міндетті түрде индексациялауды қарастырады.
«Мемлекеттік қызметшілердің әлеуметтік қорғалуына ерекше назар аударылады. Демалыс және мереке күндері жұмысқа тартылғаны үшін міндетті өтемақы төлеу, еңбек өтіліне байланысты қосымша демалыс күндерін беру көзделген. Сондай-ақ кемінде 25 жыл еңбек өтілі бар қызметшілерге зейнетке шыққанда төрт лауазымдық жалақы көлемінде төлем қарастырылған», – деп түсіндірді ол.
Құжатта мемлекеттік қызметшілердің жұмыс уақытының тәртібі де айқындалған: күнделікті жұмыс ұзақтығы 8 сағатқа дейін, ал апталық жұмыс уақыты 40 сағаттан аспауға тиіс. Бірінші және екінші топтағы мүгедектігі бар қызметшілер үшін жұмыс уақыты аптасына 36 сағаттан аспайтын қысқартылған режим белгіленеді.
Жүкті әйелдің, үш жасқа дейінгі баласы бар ата-ананың бірінің, сондай-ақ медициналық қорытындыға сәйкес науқас отбасы мүшесіне күтім жасайтын мемлекеттік қызметшінің жазбаша өтініші негізінде толық емес жұмыс уақыты режимі белгіленеді.
Мәжілістің заңнама және сот-құқықтық реформа комитетінің қорытындысына сәйкес, заң жобасы мемлекеттік қызметті сервистік және азаматтарға бағдарланған модельге көшіруді, мемлекеттік аппаратты кәсібилендіруді және HR-процестерді цифрландыруды көздейді.
Мемлекеттік қызметшілерге қойылатын негізгі талаптар ретінде қазақстандық патриотизм, кәсібилік, ашықтық, әдептілік, мінсіз бедел, сондай-ақ құқық бұзушылықтар мен мүдделер қақтығысына төзбеушілік айқындалған.
Сонымен қатар Мәжіліс мемлекеттік қызмет мәселелері бойынша бірқатар заңнамалық актілерге енгізілетін түзетулерді де бірінші оқылымда мақұлдады. Атап айтқанда, Еңбек кодексіне, «Халық денсаулығы және денсаулық сақтау жүйесі туралы» кодекске және өзге де заңдарға өзгерістер енгізу көзделген.
Түзетулер мемлекеттік қызметшілерді есірткі құралдарын, психотроптық заттарды және олардың баламаларын қолдану фактілеріне медициналық куәландырудан өткізу тәртібі мен негіздерін, сондай-ақ мұндай тексеруден өтетін лауазымдар тізбесін айқындайды.
