Астана. 5 қараша. ИНТЕРФАКС-ҚАЗАҚСТАН – Президент Қасым-Жомарт Тоқаев еліміздің ішкі саясатының негізгі қағидаттары, құндылықтары және бағыттарын бекітетін жарлыққа қол қойды. Құжаттың мәтіні сәрсенбі күні Мемлекет басшысының ресми сайтында жарияланды.
Жарлыққа сәйкес, жаңартылған ішкі саясат елдің ішкі және сыртқы жаңа жағдайларға тиімді бейімделуін қамтамасыз етуге, сондай-ақ мемлекеттік институттар мен қоғам арасындағы өзара ықпалдастықтың созидалы моделін қалыптастыруға бағытталған.
Құжат президенттің жолдаулары мен сөздері, 2029 жылға дейінгі ұлттық даму жоспары негізінде, сондай-ақ Ұлттық құрылтай мүшелерінің, мемлекеттік органдардың, қоғамдық және ғылыми ұйымдардың ұсыныстарын ескере отырып әзірленген.
«Құжат мемлекет пен қоғамның елді дамыту перспективалары туралы ортақ түсінік қалыптастыруға ықпал етеді. Ішкі саясаттың өзегі – әділ Қазақстан құру: ашық, мықты және өркендеген мемлекет, тең мүмкіндіктері бар, прогрессивті әрі жауапты қоғам», – делінген жарлықта.
Ішкі саясаттың негізгі тұғырлары ретінде келесі қағидаттар анықталған: «Заң және тәртіп», «Естуші мемлекет», «Әртүрлі пікір – біртұтас ұлт», «Күшті Президент – ықпалды Парламент – есеп беретін Үкімет», «Адал азамат», «Таза Қазақстан».
«Бұл мемлекеттік құрылыстың қағидаттары әмбебап сипатқа ие және кең қоғамдық диалог жағдайында ұлттың одан әрі топтасуына бағытталған», – деп көрсетілген құжатта.
Жарлықтың орындалуын бақылау Президент Әкімшілігіне жүктелді. Құжат қол қойылған күнінен бастап күшіне енеді.
