Евразия24ЖаңалықтарҚазақстанда жеңіл өнеркәсіпке салық жеңілдіктерін беру және проблемалық қарызы кешірілген азаматтарды жеке...

Қазақстанда жеңіл өнеркәсіпке салық жеңілдіктерін беру және проблемалық қарызы кешірілген азаматтарды жеке табыс салығынан босату жөніндегі өзгерістер мақұлданды

|

|

Астана. 20 қараша. ИНТЕРФАКС-ҚАЗАҚСТАН – Қазақстанда Премьер-министрдің орынбасары – Ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсенің 30-шы отырысында салық заңнамасына қатысты екі түзету мақұлданды. Бұл туралы Үкіметтің баспасөз қызметі хабарлады.

Бірінші түзету несие және микрокредит бойынша проблемалық берешегі кешірілген жеке тұлғаларды жеке табыс салығынан (ЖТС) босатуды көздейді.

«Талқылау қорытындысы бойынша қатысушылар қарыз алушының өз міндеттемелерін орындай алмауына себеп болатын барлық жағдайды заңнамада алдын ала қарастыру іс жүзінде мүмкін емес деген тұжырымға келді. Осыған байланысты бірыңғай тәртіп енгізу ұсынылды. Оған сәйкес, белгіленген шектеулер аясында проблемалық берешегі кешірілген жеке тұлғалар қарыз алушыларға қосымша талаптар қойылмай, ЖТС төлеуден босатылады», – делінген хабарламада.

Қазіргі уақытта банктер жылдық несие портфелінің 10 пайызына дейінгі, ал микроқаржы ұйымдары 20 пайызына дейінгі проблемалық берешекті кешірген кезде провизиялардың азаюынан түскен табысты есепке алмауға құқылы. Енді бұл шектеулерді екі есе төмендетіп, банктер үшін 5 пайыз, микроқаржы ұйымдары үшін 10 пайыз деңгейінде белгілеу ұсынылып отыр. Осы мөлшерден аспайтын берешек кешірілген жағдайда жеке тұлғаларға қосымша талап қойылмай, олар ЖТС төлеуден босатылады.

Ал белгіленген шектен асқан жағдайда кредитор артық соманы провизиялардың азаюынан түскен табыс ретінде есепке алып, салық агенті ретінде сол сомадан ЖТС төлеуге міндетті болады.

Мақұлданған түзету Салық кодексіне енгізілетін өзгерістердің жалпы пакетіне қосылады.

Екінші түзету жеңіл өнеркәсіпті дамытудың 2026–2030 жылдарға арналған кешенді жоспарында қарастырылған салықтық ынталандыру шараларына қатысты.

«Қолдау тетіктерінің бірі ретінде өндірісті жергіліктендіру деңгейін арттыру туралы келісім енгізіледі. Бұл тәртіп бойынша кәсіпорын алдымен Өнеркәсіп және құрылыс министрлігімен келісім жасасады, содан кейін арнайы инвестициялық келісімшартқа қол қояды. Соның негізінде кәсіпорынға салық жеңілдіктері беріледі», – деп түсіндірді Үкімет өкілдері.

Аталған тетікті іске асыру үшін Салық кодексіне өзгерістер енгізу қажет. Атап айтқанда, өндірісті жергіліктендіру деңгейін арттыру жөнінде келісім жасасқан ұйымдарға жер салығы, мүлік салығы, жер учаскелерін пайдаланғаны үшін төлемақы және корпоративтік табыс салығы бойынша жеңілдіктер беру көзделіп отыр.

Егер келісім кәсіпорынның кінәсінен бұзылса, салық жеңілдіктері заң бұзушылыққа жол берілген салық кезеңінің басынан бастап күшін жояды. Бұл ұсыныстар да мақұлданып, салалық заңнамаға қажетті түзетулер енгізіле отырып, Салық кодексіне әзірленіп жатқан өзгерістер пакетіне қосылады.

Талқылау барысында Жеңіл өнеркәсіп кәсіпорындары қауымдастығының өкілі Салтанат Әбдікәрімова дайын өнім өндіруге қажетті маталарды импорттау кезінде қосылған құн салығын (ҚҚС) төлеу мәселесін көтерді. Оның айтуынша, қазіргі уақытта кәсіпорындар шикізатты елге әкелген кезде ҚҚС-ты толық төлеуге міндетті. Ал тапсырыс берушілер дайын өнімнің ақысын бірнеше айдан кейін, кей жағдайда тоғыз айға дейін кешіктіріп төлеуі мүмкін. Бұл өндірушілердің айналым қаражатына қосымша салмақ түсіреді.

Мәселені шешу жолдарының бірі ретінде Мемлекеттік кірістер комитеті Қазақстан аумағында өнім өндіруге арналған маталарды импорттау кезінде ҚҚС төлеу мерзімін ұзартудың қолданыстағы тетігін пайдалануды қарастыруды ұсынды.

Бұған дейін хабарланғандай, Президент Қасым-Жомарт Тоқаев Қазақстан халқына Жолдауында Үкіметке жақында қабылданған жаңа Салық кодексінің жекелеген нормаларын қайта қарап, нақты өзгерістер енгізуді тапсырған болатын. Мемлекет басшысы бұл ретте «бизнес өкілдерінің пікіріне құлақ асу» қажеттігін атап өтті. Президенттің айтуынша, Қазақстанның салық заңнамасы тым күрделі әрі ауқымды болып кеткендіктен, кәсіпкерлер үшін нағыз бас ауруына айналған.

«Салық кодексі – қатып қалған қағида да, қасиетті жазба да емес. Ол өмір шындығынан алшақ болмауы тиіс», – деді Президент.

Кейін Премьер-министрдің орынбасары Серік Жұманғарин салық заңнамасына қатысты түзетулерді биылғы жылдың соңына дейін Құрылтайдың (бір палаталы парламент) қарауына енгізу жоспарланып отырғанын хабарлады.

Жаңа Салық кодексі 2026 жылғы 1 қаңтарда күшіне енді.

Перепечатка и копирование материалов допускаются только с указанием ссылки на eurasia24.media

Бөлісу:

Читать далее:
Related

Азия-Тынық мұхиты өңірінің қор индекстері төмендеп жатыр

Жұма күнгі сауда барысында Азия-Тынық мұхиты өңірінің қор индекстері айтарлықтай төмендеді. Осы апта өңірдің қор нарықтары үшін соңғы алты жылдан астам уақыт ішіндегі ең сәтсіз кезең болуы мүмкін.

Сауд Арабиясы қыркүйекте мұнай өндіру көлемін 34%-ға, экспортын 21%-ға арттырды – JODI

Сауд Арабиясы қыркүйек айында мұнай өндіру көлемін тамызбен салыстырғанда 34,2 пайызға, ал экспортын 20,9 пайызға ұлғайтты. Бұл туралы Joint Organization Data Initiative (JODI) ұйымының сайтында хабарланды.

Алтын бағасы 3,3%-ға төмендеп, наурыздан бергі ең үлкен апталық құлдырауға бет алды

Мәскеу. 20 қараша. ИНТЕРФАКС – Жұма күні алтын бағасы...

Қытай он айда Ресейден бидай импортын 3,2 есе, арпа импортын 2,3 есе, жүгері импортын 34,2%-ға арттырды – ҚХР Бас кеден басқармасы

2026 жылдың қаңтар–қазан айларында Қытай Ресейден 21,6 млн долларға бидай импорттады. Бұл 2025 жылдың сәйкес кезеңіндегі көрсеткіштен (6,7 млн доллар) 3,2 есе көп. Мұндай мәлімет Қытай Халық Республикасының Бас кеден басқармасы жариялаған материалдарда келтірілген.