Астана. 15 маусым. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Геннадий Головкинді Халықаралық бокс даңқы залына (IBHOF) ресми түрде қабылдануымен құттықтады. Бұл туралы Мемлекет басшысының баспасөз хатшысы Айбек Смадияров хабарлады.
«Президент Қасым-Жомарт Тоқаев бұл тарихи оқиға аңызға айналған отандасымыздың әлемдік спорттағы мұрасының ерекше маңызын, сондай-ақ Қазақстанның халықаралық аренадағы объективті бейнесі мен беделін нығайтуға қосқан зор үлесін айқын көрсететінін атап өтті», – деп жазды Смадияров дүйсенбі күні әлеуметтік желідегі парақшасында.
Мемлекет басшысының айтуынша, Геннадий Головкин – Қазақстанның спорттық даңқының символы әрі халықаралық спорт қауымдастығындағы елдің лайықты өкілі.
«Қасым-Жомарт Тоқаев әлемнің үздік боксшыларының бірі саналатын Геннадий Головкиннің жетістік жолы алдағы уақытта да жас спортшыларды биік мақсаттарға ұмтылуға жігерлендіре беретініне сенім білдірді», – деді Смадияров.
Головкинді Халықаралық бокс даңқы залына қабылдаудың салтанатты рәсімі 15 маусым күні АҚШ-тың Канастота қаласында өтті.
Ол осы мәртебеге ие болған Қазақстан мен Орталық Азия тарихындағы алғашқы спортшы атанды.
