Астана. 15 маусым. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Қорғаныс министрі Дәурен Қосановқа Қарулы күштердің жауынгерлік әзірлігін арттыруға, әскери даярлық жүйесін жетілдіруге және әскерді цифрлық трансформациялауға бағытталған бірқатар міндет жүктеді. Бұл туралы Мемлекет басшысының баспасөз қызметі хабарлады.
Президентке 2026 жылдың өткен кезеңіндегі қорғаныс ведомствосының қызмет қорытындылары, әскери қызметшілерді әлеуметтік қорғау шаралары және әскери қызметтің беделін арттыру бағытындағы жұмыстар туралы есеп берілді.
Дәурен Қосанов Қарулы күштердің жауынгерлік даярлығының жай-күйі, Цифрландыру және жасанды интеллект жылы аясында атқарылып жатқан іс-шаралар, сондай-ақ қорғаныс ведомствосындағы автоматтандырылған басқару жүйелері мен цифрлық инфрақұрылымды дамыту жөнінде баяндады.
Сонымен қатар министр әскери басқару органдарының үйлесімді іс-қимылын күшейтуге және әскердің жауынгерлік әлеуетін арттыруға бағытталған «Батыл тойтарыс – 2026» стратегиялық командалық-штабтық оқу-жаттығуларына дайындық барысы туралы мәлімет берді.
Қорғаныс министрі сондай-ақ Голан жоталарында қызмет атқарған екінші ұлттық контингенттің миссиясы сәтті аяқталғанын және үшінші контингенттің ротациясы жүзеге асырылғанын хабарлады. Бұдан бөлек, ол қазақстандық әскери қызметшілердің бейбітшілік пен қауіпсіздікті қамтамасыз етуге қосқан үлесіне халықаралық деңгейде жоғары баға берілгенін атап өтті.
Кездесу барысында жас ұрпақты тәрбиелеу мәселелеріне де ерекше назар аударылды. Атап айтқанда, 21-27 маусым аралығында Бурабайда өтетін «Айбын-2026» халықаралық әскери-патриоттық жастар жиынына дайындық жұмыстары қаралды.
