Бейжің. 16 мамыр. ИНТЕРФАКС — Қытай мен АҚШ бірқатар тауарға қатысты өзара кедендік баж мөлшерін азайту туралы келісімге келді. Бұл туралы Bloomberg агенттігі ҚХР Сауда министрлігінің мәлімдемесіне сілтеме жасап хабарлады.
Құжатта мұндай қадам сауда көлемін ұлғайту, соның ішінде ауыл шаруашылығы саласындағы ынтымақтастықты кеңейту мақсатында қабылданғаны айтылған. Алайда баж салығы төмендетілетін нақты тауарлар әзірге жарияланған жоқ. Тараптар келісімнің егжей-тегжейін талқылауды жалғастырып жатыр.
Қытай Сауда министрлігі АҚШ-тың Қытайға импортталатын америкалық ауыл шаруашылығы өнімдеріне қатысты талаптарын да қарастыратынын мәлімдеді.
Сонымен қатар мәлімдемеде Қытайдың АҚШ-тан ұшақ сатып алуды жоспарлап отырғаны расталған. Бірақ қандай үлгідегі және қанша ұшақ алынатыны нақтыланбаған.
Бұған дейін АҚШ президенті Дональд Трамп Қытайға сапары барысында бірнеше маңызды сауда келісімі жасалғанын айтқан еді. Ал АҚШ-қа қайтар жолда президенттік ұшақта журналистермен сөйлескен Трамп Бейжіңде Қытай төрағасы Си Цзиньпинмен кездесулер кезінде сауда тарифтері мәселесі талқыланбағанын мәлімдеді.
