Астана. 16 шілде. ИНТЕРФАКС-ҚАЗАҚСТАН – Президент Қасым-Жомарт Тоқаев қытайлық Guoyou Materials Industry Group Co., Ltd директорлар кеңесінің төрағасы Юй Боянмен кездесіп, Маңғыстау облысындағы Құрық портының көпфункционалды терминалының бірінші кезеңін салу жобасын талқылады. Бұл туралы Ақорданың баспасөз қызметі хабарлады.
Кездесу барысында тараптар порт инфрақұрылымы саласындағы өзара тиімді ынтымақтастықтың келешегін қарастырды.
Президент Қазақстанның Еуразиядағы толыққанды көлік-логистикалық хабқа айналуды мақсат етіп отырғанын атап өтіп, еліміз аумағында мультимодальды порт хабын құру бастамасын қолдайтынын жеткізді.
Guoyou Materials Group компаниясы Құрық портының көпфункционалды терминалының бірінші кезеңін салу жобасын жүзеге асыруды жоспарлап отыр. Жобаның алғашқы жылында терминалдың өткізу қабілетін 15 млн тоннаға дейін жеткізу көзделген.
Тоқаев аталған жобаның теңіз және теміржол логистикасын ықпалдастыруға, өңірдің көлік инфрақұрылымының өткізу мүмкіндігін арттыруға, сондай-ақ Қазақстанның экспорттық және транзиттік әлеуетін кеңейтуге ықпал ететініне сенім білдірді.
Өз кезегінде Юй Боян жобаның негізгі бағыттары туралы айтып, Каспий теңізіндегі теңіз тасымалының даму перспективасына қатысты көзқарасымен бөлісті.
Кездесу барысында порт хабын құру ұзақ мерзімді әлеуметтік-экономикалық нәтиже беріп, жаңа жұмыс орындарының ашылуына, саланың кадрлық әлеуетін дамытуға және қазақстандық тауарлар мен қызметтерді кеңінен пайдалануға мүмкіндік беретіні атап өтілді.
Бұған дейін Мемлекет басшысының баспасөз қызметі Қазақстанның Көлік министрлігі, Маңғыстау облысының әкімдігі және Kazakhstan Guoyou Investment компаниясы арасында Құрық портының көпфункционалды терминалының бірінші кезеңін салу жобасы бойынша инвестициялық келісімге қол қойылғанын хабарлаған болатын.
Құрық порты Каспий теңізінің шығыс жағалауында, Ақтау портынан оңтүстікке қарай табиғи шығанақта орналасқан. Паром кешені астық, мұнай өнімдері, тыңайтқыштар, химиялық өнімдер және басқа да жүктерді қайта тиеуге маманданған. Теміржол-паром және автомобиль кешендерінің жылдық өткізу қабілеті 7 млн тоннадан асады.
