Лондон. 24 қыркүйек. ИНТЕРФАКС – Тайванда болған «Рагаса» тайфуны салдарынан орын алған су тасқынынан 14 адам қаза тапты, деп хабарлады Sky News сәрсенбі күні.
Табиғи апаттан аралдың шығыс бөлігі ең көп зардап шекті – 129 адам із-түзсіз жоғалғандар қатарында.
Қытайдың материктік бөлігінде, атап айтқанда, елдің оңтүстігіндегі Гуандун провинциясының он қаласында, мектептер, дүкендер мен кәсіпорындар жабылып, қоғамдық көлік қозғалысы уақытша тоқтатылды.
Провинциядағы ірі қалалардың бірі — Шэньчжэньдегі әуежайда 529 рейс тоқтатылғаны хабарланды.
Филиппиндерде де табиғи апат салдары сезілді — төрт адам қаза тауып, 700 мыңнан астам адам зардап шеккені туралы мәлімет бар.
Бұған дейін Гуандун провинциясының Чжухай мен Чжаньцзян қалаларында лай көшкіні жүру қаупі бар екені ескертілген болатын.
Гонконг әуежайында да 100-ден астам рейс тоқтатылды. 86 ішкі және 30-дан астам халықаралық бағыт бойынша ұшулар орындалмаған. Сондай-ақ Emirates (Дубай), Lufthansa (Франкфурт-на-Майне), Air France (Париж) секілді әлемдік ірі әуе компанияларының бірнеше рейстері де ұшпай қалған.
South China Morning Post (SCMP) басылымының мәліметінше, уақытша шектеулер жергілікті уақытпен бейсенбі күні таңғы 06:00-ге дейін (Мәскеу уақытымен 01:00) жалғасады.
Айта кетейік, Қытайдың оңтүстік жағалауында тайфундар жиі болып тұрады. Мәселен, 2017 жылы болған «Хато» тайфуны – 1962 жылдан бергі ең жойқын дауыл саналған. Оның салдарынан 270 адам зардап шекті, соның ішінде 120 адам – Гонконгта.
