Астана. 24 қыркүйек. ИНТЕРФАКС-ҚАЗАҚСТАН – БҰҰ Бас Ассамблеясының 80-сессиясы аясында Қазақстан Президенті Қасым-Жомарт Тоқаев пен Бельгия Премьер-министрі Барт де Вевер арасында екіжақты кездесу өтті. Бұл туралы Мемлекет басшысының баспасөз қызметі хабарлады.
«Мемлекет басшысы Қазақстанның Еуропалық Одақтағы маңызды серіктестерінің бірі саналатын Бельгиямен ұзақ мерзімді ынтымақтастықты дамытуға ерекше мән беретінін атап өтті», – делінген хабарламада.
Қасым-Жомарт Тоқаев Брюссельдің Қазақстан экономикасына инвестиция салушы ірі он елдің қатарына кіретінін айтты. Өткен жылы екі ел арасындағы тауар айналымы жарты миллиард долларға жуықтады.
«Кездесу барысында тараптар экономикалық байланыстарды одан әрі кеңейтуге мол мүмкіндік бар екенін атап өтті. Әсіресе, стратегиялық маңызы бар минералдар, мұнай-химия, ауыл шаруашылығы, өнеркәсіп, көлік және логистика, жасанды интеллект, қаржы, туризм және білім беру салаларында өзара ықпалдастықты дамыту әлеуеті жоғары екені айтылды», – деп хабарлады Президенттің баспасөз қызметі.
Өз кезегінде Барт де Вевер екіжақты мәселелерді талқылауға мүмкіндік бергені үшін ризашылығын білдіріп, Бельгия королі Филипптің Қазақстан Президентіне жолдаған жылы лебізі мен сәлемін жеткізді.
