Астана. 29 қазан. Интерфакс-Қазақстан – «Самрук-Қазына» АҚ басқарма төрағасы Нұрлан Жақыпов АҚШ Президентінің Оңтүстік және Орталық Азия жөніндегі арнайы өкілі, АҚШ-тың Үндістандағы елшісі Сержио Гор және АҚШ Мемлекеттік хатшысының бірінші орынбасары Кристофер Ландаумен кездесу өткізіп, екіжақты әріптестікті нығайту және экономикалық байланыстарды дамыту мәселелерін талқылады. Бұл туралы қордың баспасөз қызметі хабарлады.
Кездесу барысында Нұрлан Жақыпов американдық компаниялармен практикалық ынтымақтастықты кеңейтуге мол мүмкіндік бар екеніне сенім білдірді.
Баспасөз қызметінің мәліметінше, Қазақстанның мұнай-газ секторында Chevron және ExxonMobil компаниялары қатысатын ірі жобалар – Теңіз, Қарашығанақ және Қашаған жүзеге асырылып келеді.
Көлік саласында Wabtec Kazakhstan зауыты локомотивтерді шығарып, қызмет көрсетуде. Энергетикада электр желілерін цифрландыру және жаңғырту бойынша GE жабдықтары пайдаланылады. Ұлттық әуе тасымалдаушы Air Astana Boeing 767 әуе кемелерін қолданады.
Кен өндіру саласында «Тау-кен Самұрық» компаниясы мен Cove Capital сирек металдарға қатысты барлау жұмыстарын бірлесіп жүргізуде.
Сонымен қатар спутниктік интернетті дамыту бағытында Amazon Kuiper мен «Қазақтелеком» арасында әріптестік орнатылып отыр.
