ДУБАЙ. 1 қыркүйек. ИНТЕРФАКС — Сирияның оңтүстігіндегі Эс-Сувейда провинциясында елдің қауіпсіздік күштері мен друздардың қарулы тобы арасында атыс болды, деп хабарлады сейсенбі күні The National басылымы.
Оқиға бір күн бұрын болып, кемінде 10 адам жараланған. Тараптар атысты бірінші болып қарсы жақ бастады деп бір-бірін айыптап отыр. Сирияның мемлекеттік БАҚ-тары кейінгі тәулікте қауіпсіздік күштері өздеріне қарсы топтардың бірнеше шабуылына тойтарыс бергенін хабарлады. Артиллерия мен пулеметтен атылған оқтан бірнеше адам жараланған.
The National мәліметінше, үкімет күштері 2025 жылғы шілдеде бұл аумақты бақылауына ала алмағаннан кейін провинцияның әкімшілік орталығы Эс-Сувейда қаласының маңына орналасқан. Негізінен друздар тұратын бұл өңір — Дамаск билігіне әлі бағынбаған Сириядағы санаулы аумақтардың бірі. Үкімет жасақтары Эс-Сувейданы Дамаск маңындағы Джарамана қаласынан бөліп тастаған. Джараманада да негізінен друздар мен сириялық христиандар тұрады.
Басылымның жазуынша, бұған дейін Израиль әскерінің араласуы Эс-Сувейда провинциясындағы друздарға өз позицияларын сақтап қалуға мүмкіндік берген.
2025 жылы Сирияның жаңа билігі бірнеше рет қарулы қақтығыстарға тап болды. Наурызда жағалаудағы провинцияларда үкімет күштері мен алавиттер арасында қақтығыс болса, сәуірде Дамаск маңында друздармен қарулы текетірес болды. Сол жылдың 13–20 шілдесінде Эс-Сувейдада түрлі қауым өкілдері арасында қарулы қақтығыс болып, 1,3 мыңнан астам адам қаза тапты. Олардың басым бөлігі друздар еді. Друздарды қолдайтын Израиль Сирия аумағына бірнеше рет соққы жасады. Кейін, 19 шілдеге қараған түні АҚШ-тың Түркиядағы елшісі Томас Баррак Сирия мен Израиль билігі бітімге келуге уағдаласқанын мәлімдеді
