Дубай. 6 мамыр. ИНТЕРФАКС – Тегеранда АҚШ пен Иран арасындағы қақтығысты реттеу жөніндегі америкалық ұсыныстар әлі де талқыланып жатыр, кейін Иран билігі өз ұстанымын Пәкістандағы делдалдарға жеткізеді. Бұл туралы Иран Сыртқы істер министрлігінің ресми өкілі Исмаил Багаи мәлімдеді.
«АҚШ ұсынған жоспар мен ұсыныстар Иран тарапынан әлі де қарастырылуда. Қорытынды жасалып, ортақ ұстаным айқындалғаннан кейін Иран өз ескертулерін пәкістандық тарапқа жолдайды», – деп ISNA агенььігі оның сөзін келтірді.
Бұған дейін сәрсенбі күні Axios дереккөздерге сілтеме жасап, АҚШ келіссөз жүргізушілері Иранмен қарулы қақтығысты тоқтату шарттары қамтылатын бір беттік өзара түсіністік туралы меморандумды келісу кезеңіне жақындап қалғанын хабарлаған. Америкалық тарап Иран алдағы 48 сағат ішінде осы құжаттың бірқатар негізгі тармақтарына қатысты жауап береді деп күтуде.
Дереккөздердің мәліметінше, ядролық мәселені кейінгі кезеңде қарастыру жоспарланған.
Сонымен қатар, сәрсенбі күні АҚШ президенті Дональд Трамп Иран АҚШ талаптарымен келіссе, америкалық әскери операция аяқталуы мүмкін екенін, бірақ сонымен бірге әуе соққыларының қайта жандануы да ықтимал екенін жоққа шығармады.
