Астана. 22 маусым. ИНТЕРФАКС-ҚАЗАҚСТАН – Қазақстан жасанды интеллект саласындағы Еуропалық одақпен ынтымақтастықты кеңейтуді көздеп отыр. Мемлекет басшысы Қасым-Жомарт Тоқаевтың айтуынша, бұл бағыт болашақтағы бәсекеге қабілеттіліктің негізгі факторларының біріне айналмақ.
«(…) біздің серіктестігіміз енді болашақтағы өркендеуді қамтамасыз ететін технологияларды да қамтуы тиіс. Жасанды интеллект, цифрлық басқару, инновациялық экожүйелер мен сенімді технологиялар экономикалық бәсекеге қабілеттілік пен ұлттық орнықтылықтың негізгі элементтеріне айналып келеді», – деп жазды Президент Брюссельге сапары қарсаңында Euronews басылымында жарияланған бағдарламалық мақаласында.
Мемлекет басшысы мемлекеттік қызметтерді цифрландыру, деректерге негізделген басқару жүйесін дамыту және жасанды интеллект саласына инвестиция тарту арқылы Қазақстанның неғұрлым цифрлық мемлекетке айналу мақсатын алға қойғанын атап өтті.
«Технологиялық прогрестің инклюзивті, қауіпсіз әрі адам мүддесіне бағытталған болуын қамтамасыз ету үшін еуропалық технологиялық компаниялармен тығыз ынтымақтастықты жалғастыруға ниеттіміз», – деді Қасым-Жомарт Тоқаев.
Президенттің айтуынша, Қазақстанның Erasmus+ және Horizon Europe бағдарламаларына қатысуы ашылып отырған мүмкіндіктердің ауқымын айқын көрсетеді. Осыған байланысты академиялық ұтқырлық пен ғылыми ынтымақтастықты кеңейтіп, бірлескен инновациялық жобаларды көбейтіп, жастардың дамуына жаңа мүмкіндіктер ашу қажет.
Қасым-Жомарт Тоқаев Қазақстан серіктестер мен инвесторлар үшін жаңа нарықтарға жол ашуға, тұрақты ережелердің сақталуын қамтамасыз етуге және болжамды, әділ әрі ашық экономикалық басқару жүйесін қалыптастыруға мүдделі екенін айтты.
«Соңғы он жыл бізге табысты ынтымақтастық орнатуға болатынына сенім ұялатты. Алдағы онжылдықта серіктестігіміз нақты нәтижелер беруі тиіс деп санаймын. Еуропа мен Қазақстан өзара әріптестікті нығайту үшін қажетті құралдар мен ресурстардың басым бөлігіне қазірдің өзінде ие. Қалғанын біз инновациялар арқылы бірлесе қалыптастырамыз», – деді Мемлекет басшысы.
