Астана. 15 маусым. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев АҚШ-тың Халықаралық даму жөніндегі қаржы корпорациясының (DFC) атқарушы директоры Бен Блэкті қабылдады. Кездесу барысында корпорацияның Қазақстанда өкілдігін ашу мүмкіндігі талқыланды. Бұл туралы Мемлекет басшысының баспасөз қызметі хабарлады.
Хабарламада айтылғандай, Қасым-Жомарт Тоқаев қазақстандық тараптың бірлескен инвестициялық жобаларды нақты іске асыруға дайын екенін растады.
Тараптар стратегиялық маңызы бар пайдалы қазбалар, көлік байланысы, агроөнеркәсіптік кешен, цифрландыру және жасанды интеллект салаларындағы ынтымақтастық перспективаларын қарастырды. Сонымен қатар АҚШ-тың Халықаралық даму жөніндегі қаржы корпорациясының Қазақстандағы тұрақты өкілдігін ашу мәселесіне ерекше назар аударылды.
Президенттің айтуынша, Дональд Трамп әкімшілігі қызметке кіріскеннен кейін Вашингтонның Астанамен және жалпы Орталық Азия өңірімен өзара іс-қимылы едәуір жандана түскен.
«Біз АҚШ президентінің дипломатия саласындағы батыл көзқарасы мен прагматикалық ұстанымын толық қолдаймыз. Қазақстан Авраам келісімдері, Бейбітшілік кеңесі, TRIPP бастамасы және басқа да жобаларды қоса алғанда, америкалық маңызды бастамаларды ілгерілетуге белсенді түрде қатысып келеді. Бұл күш-жігердің барлығы кеңейтілген стратегиялық әріптестігіміздің жаңа серпін алуына ықпал етті және бүгінде ол бұрынғыдан да нығая түсті», – деп келтірілген Президенттің сөздері хабарламада.
Қасым-Жомарт Тоқаев DFC корпорациясының инвестициялық басымдықтары Қазақстанның даму күн тәртібімен үндесетінін атап өтіп, еліміздің өзара тиімді әрі практикалық ынтымақтастыққа дайын екенін мәлімдеді.
