АСТАНА. 10 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев теннисші Елена Рыбакинаны әлемнің бірінші ракеткасы атануымен құттықтады.
«WTA рейтингінде бірінші орынға көтерілу – Сіздің ерекше талантыңыздың, орасан еңбегіңіз бен өз күшіңізге деген берік сеніміңіздің арқасында бағындырған биік белесіңіз. Осы тарихи жетістігіңізбен Қазақстан спортының абыройын асқақтатып, есіміңізді әлемдік теннис тарихына жаздыңыз», – делінген Президенттің құттықтауында.
«Сіздің спорттағы жолыңыз еліміздегі мыңдаған жас спортшыға және әлемнің түкпір-түкпіріндегі миллиондаған теннис жанкүйеріне үлгі. Сондай-ақ кортта да, күнделікті өмірде де түрлі адамдармен қарым-қатынас кезінде жоғары мәдениет танытып жүрсіз. Бұл Сіздің парасатыңыз бен тәрбиеңізді аңғартады», – деді Қасым-Жомарт Тоқаев.
Мемлекет басшысының баспасөз хатшысы Айбек Смадияровтың мәліметінше, Президент Елена Рыбакинаға жеңіске деген жігерін жоғалтпай, жаңа жетістіктерге нық қадам баса беруіне тілектестік білдірді.
Қазақстандық теннисші Елена Рыбакина US Open-2026 – маусымдағы «Үлкен дулыға» сериясының соңғы турнирінде жартылай финалға шыққаннан кейін карьерасында алғаш рет WTA әлемдік рейтингінің көшін бастады.
