Астана. 22 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Транскаспий халықаралық көлік бағдарын (ТХКБ) Еуропа мен Азияны жалғайтын логистикалық бағыт ретінде ғана емес, сондай-ақ біртұтас экономикалық кеңістікті қалыптастырудың негізі ретінде қарастыруды ұсынады.
Мемлекет басшысы шикізат экспорттауға негізделген дәстүрлі ынтымақтастық үлгісінен өндірістік тізбектің барлық кезеңінде қосылған құн қалыптастыратын әріптестікке көшуді ұсынды. Бұл қайта өңдеуді, технологиялар трансферін және ғылыми-зерттеу саласындағы өзара іс-қимылды қамтиды.
«Қазақстанда біз Жібек жолы секілді қауіпсіз әрі тиімді көлік бағыттарының қашанда стратегиялық маңызға ие болғанын жақсы түсінеміз», – деп атап өтті Қасым-Жомарт Тоқаев Брюссельге сапары қарсаңында Euronews басылымында жарияланған мақаласында.
Президенттің айтуынша, Еуропа мен Азияны жалғайтын Орта дәліз Еуропалық одақтың Global Gateway стратегиясымен табиғи түрде үйлеседі.
«Орта дәлізді еуропалық нарықтар мен экономикалық өсімнің қозғаушы күштерін Орталық Азияның ресурстарымен, дамып келе жатқан өндірістік базасымен және логистикалық әлеуетімен байланыстыратын қалыптасып келе жатқан жүйенің негізі ретінде қарастырған жөн», – деп жазды Мемлекет басшысы.
Оның пікірінше, қазіргі заманғы көлік байланыстары сауданы дамытуға ғана емес, сонымен қатар инвестициялар тартуға, кәсіпкерлік белсенділікті арттыруға және өнеркәсіптік кооперацияны ынталандыруға ықпал етуі тиіс.
Транскаспий халықаралық көлік бағдары, яғни Орта дәліз, Қытай мен Еуропаны Қазақстан, Каспий теңізі, Әзербайжан, Грузия және Түркия арқылы байланыстырады.
