***Президент ЕО-мен энергетикалық әріптестік үлгісін ауыл шаруашылығы мен стратегиялық маңызы бар шикізат саласына да қолдануды ұсынды
Астана. 22 маусым. ИНТЕРФАКС-ҚАЗАҚСТАН – Қазақстан Еуропалық одаққа импортталатын мұнайдың шамамен 13 пайызын және табиғи уран жеткізілімінің 16 пайызын қамтамасыз етеді. Бұл энергетика саласындағы ынтымақтастықты Астана мен Брюссель арасындағы қатынастардың негізгі тіректерінің біріне айналдырып отыр. Бұл туралы Қазақстан Президенті Қасым-Жомарт Тоқаев мәлімдеді.
«Өзара тәуелділік орнықтылықты қалыптастырады. Сенімділік стратегиялық маңызға ие бола бастаған энергетика саласын мысалға алайық. Қазіргі таңда Қазақстан Еуропалық одаққа импортталатын мұнайдың шамамен 13 пайызын және табиғи уран жеткізілімінің 16 пайызын қамтамасыз етіп отыр», – деп жазды Мемлекет басшысы Брюссельге сапары қарсаңында Euronews басылымында жарияланған мақаласында.
Президент энергетикалық қауіпсіздік Қазақстан мен Еуропалық одақ арасындағы өзара сенімнің, орнықтылықтың артуының және барған сайын тұрақсыз сипат алып отырған әлем жағдайында әрекет ете алу қабілетінің айқын көрінісі екенін атап өтті.
«Неліктен осындай тәсілді ауыл шаруашылығы саласында қолданбасқа? Азық-түлік қауіпсіздігі бүкіл әлем үшін барған сайын маңызды стратегиялық мәселеге айналып келеді. Қазақстан астық өндіру және экспорттау бойынша әлемдегі жетекші елдердің бірі саналады және әртараптандыруға мүдделі еуропалық нарықтар үшін айтарлықтай әлеуетке ие. Сонымен қатар еуропалық ноу-хау, технологиялар мен инвестициялар еліміздегі ауыл шаруашылығы өнімдерін терең өңдеуді дамытуға және олардың қосылған құнын арттыруға ықпал ете алады», – деді Қасым-Жомарт Тоқаев.
Президенттің пікірінше, орнықты экономикалық өсімге көшу үдерісі бұрын-соңды болмаған деңгейдегі өзара іс-қимылды талап етеді.
«Стратегиялық маңызы бар шикізат, жаңартылатын технологиялар, энергия тиімділігі және жаңа өнеркәсіптік экожүйелер болашақтағы бәсекеге қабілеттілікті айқындайтын маңызды факторларға айналып келеді. Бұл тұрғыда Қазақстан елеулі ресурстық және өндірістік әлеует ұсына алады. Ал Еуропа өз кезегінде тәжірибе, технология және инвестициямен қолдау көрсетсе, екі экономиканың да өсімі қамтамасыз етіліп, олардың тұрақтылығы арта түседі», – деп атап өтті Мемлекет басшысы.
