Астана. 22 маусым. ИНТЕРФАКС-ҚАЗАҚСТАН – Қазақстан Үкіметі жол бойы сервисі нысандарын салуға шамамен 180 млрд теңге инвестиция тарту жобасын мақұлдады. Бұл туралы Үкіметтің баспасөз қызметі хабарлады.
Атап айтқанда, Премьер-министр Олжас Бектенов Көлік министрлігі мен «Car Park Transformer» ЖШС арасында жаңартылатын энергия көздерін пайдалана отырып, жол бойы сервисі станцияларын салу жөніндегі инвестициялық жоба туралы келісімді мақұлдайтын қаулыға қол қойды.
Жеке инвестициялардың жалпы көлемі 179,5 млрд теңгені құрайды.
Жоба аясында 2030 жылға дейін халықаралық және республикалық маңызы бар автожолдар бойындағы демалыс алаңдарында 250 жол бойы сервисі станциясын салу көзделген.
Алғашқы 50 нысан биыл салынып, пайдалануға беріледі.
«Жаңа станциялар іргелес аумақтары абаттандырылып, көгалдандырылған заманауи көпфункционалды кешендер болады. Олардың құрамына санитарлық-тұрмыстық бөлмелер, сауда және қызмет көрсету орындары, электр көліктерін қуаттау станциялары мен күн энергетикалық қондырғылары кіреді», – делінген хабарламада.
Қазіргі уақытта Қазақстанда халықаралық және республикалық маңызы бар автожолдар бойында 1 428 сервис нысаны жұмыс істеп тұр.
Бұған дейін Ұлыбританияның Car Park Transformer компаниясы Көлік министрлігімен өзара түсіністік туралы меморандумға қол қойып, Қазақстанда электр көліктерін қуаттау станцияларымен жабдықталған автосервис кешендерін салуды жоспарлап отырғаны хабарланған болатын. Компания қазақстандық жеткізу тізбектерін пайдалануды және жергілікті мамандарды жұмысқа тартуды көздеп отыр.
Car Park Transformer автокөліктерге арналған күн панельдері орнатылған шатырлар мен электр көліктерін қуаттау шешімдерін өндіруге маманданған.
«Car Park Transformer» ЖШС 2025 жылдың шілдесінде Қосшы қаласында тіркелген. Кәсіпорын қызметінің негізгі бағыты ретінде күн электр станциялары арқылы электр энергиясын өндіру көрсетілген.
22 маусымдағы ресми бағам бойынша, 1 АҚШ доллары 488,37 теңгені құрайды.
