Астана. 21 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Армения Премьер-Министрі Никол Пашинянды «Алтын Қыран» орденімен марапаттады, деп хабарлады жұма күні Мемлекет басшысының баспасөз қызметі.
«Сіздің қазақ-армян қатынастарын дамытуға қосқан ерекше үлесіңіз бен айрықша рөліңізді мойындай отырып, бүгін Сізге Қазақстан Республикасының ең жоғары мемлекеттік марапаты – “Алтын Қыран” орденін табыстау туралы шешім қабылдадым. Бұл оқиға халықтарымыз арасындағы мызғымас бауырластықтың, өзара сенім мен ортақ болашаққа ұмтылыстың жарқын нышаны болатынына сенімдімін», – деді Мемлекет басшысы марапаттау рәсімі барысында.
Президент Тоқаев Никол Пашинянды Арменияның шынайы ұлттық көшбасшысы деп есептейтінін атап өтті.
«Сіздің көреген басшылығыңызбен Армения тұрақты даму жолына нық қадам басты, халықаралық аренадағы орнын нығайтып, ішкі және сыртқы саясатта байыпты әрі жауапты ұстанымымен үлгі көрсетті. Геосаяси тұрғыдан күрделі кезеңде Сіз шын мәніндегі батыл және тың шешімдер қабылдау қабілетіңізді танытып, бұл шешімдер сөзсіз армян халқына пайда әкеледі», – деді Тоқаев.
Мемлекет басшысы сондай-ақ Пашинянның Армения мен Әзербайжан арасындағы бейбіт үдерісті ілгерілетудегі және Вашингтонда тиісті қорытынды құжатқа қол қою ісіндегі маңызды рөлін ерекше атап өтті.
Президент Қазақстан мен Армения арасындағы мемлекетаралық қарым-қатынастардың стратегиялық әріптестік деңгейіне көтерілгенін айтты. «Бұл бағыттағы көпқырлы ынтымақтастықты дамытуда Сіздің белсенді қатысуыңыз үлкен рөл атқарды», – деді Мемлекет басшысы.
Өз кезегінде Никол Пашинян Қазақстанның ең жоғары мемлекеттік марапатын алу өзі үшін зор мәртебе екенін айтып, Қасым-Жомарт Тоқаевқа шынайы ризашылығын білдірді.
«Бауырлас Қазақстан Республикасының жоғары марапатына ие болу – мен үшін үлкен құрмет. Бұл марапатты тікелей Сіздің қолыңыздан алу – тіпті маңызды. Сіз – тәжірибелі саясаткер, мемлекет және дипломатия қайраткерісіз, сондықтан Сіздің бағаңыз өте құнды. Бұл марапат екіжақты қарым-қатынастарды ғана емес, сонымен қатар тұтас аймақтық ынтымақтастықты одан әрі дамытуға да серпін беретініне сенемін», – деді Армения Премьер-Министрі.
