Астана. 24 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Еуропалық Одақтың Орталық Азия бойынша арнайы өкілі Эдуардс Стипрайспен кездесуде еліміз бен Еуроодақ арасындағы жан-жақты ынтымақтастықты одан әрі нығайтудың маңыздылығын атап өтті, деп хабарлайды Мемлекет басшысының баспасөз қызметі.
«Ақордада Еуроодақтың жоғары өкілін қабылдай отырып, Қасым-Жомарт Тоқаев Еуропалық Одақты Қазақстанның негізгі әрі сенімді серіктестерінің бірі ретінде атай келе, тараптар арасындағы жан-жақты өзара іс-қимылды күшейтудің маңызын ерекше атап өтті», – делінген дүйсенбіде таратылған ақпаратта.
Президенттің айтуынша, биыл қол қойылғанына 10 жыл толып отырған Қазақстан мен Еуропалық Одақ арасындағы Кеңейтілген әріптестік және ынтымақтастық туралы келісім екіжақты қатынастарды дамытудағы маңызды кезең болды.
Сонымен қатар, Мемлекет басшысы Орталық Азия елдері мен Еуроодақ арасындағы белсенді әрі сындарлы диалогтың жоғары бағаланатынын жеткізді.
Өз кезегінде Эдуардс Стипрайс Еуроодақтың Қазақстанмен қарым-қатынасты нығайтуға бейілді екенін айтып, екіжақты және өңірлік күн тәртібіндегі кең ауқымды бағыттар бойынша практикалық ынтымақтастықтың серпінді дамуына сенім білдірді.
