Астана. 1 маусым. ИНТЕРФАКС-ҚАЗАҚСТАН – Президент Қасым-Жомарт Тоқаев қазақстандықтарды Халықаралық балаларды қорғау күнімен құттықтады.
«Барша отандастарымды Халықаралық балаларды қорғау күнімен құттықтаймын! Жас ұрпақтың құқықтары мен денсаулығын қорғау, олардың жан-жақты әрі үйлесімді дамуына қолайлы жағдай жасау – жалпыұлттық міндет әрі конституциялық жауапкершілік. Бақытты балалық шақтың берік негізі – тату және ынтымағы жарасқан отбасы», – деп жазды Тоқаев дүйсенбі күні Instagram парақшасында.
Президенттің айтуынша, өсіп келе жатқан ұрпақтың жасампаздық әлеуеті зор. Мұны балалардың білім, спорт және шығармашылық салаларындағы жетістіктері айқын дәлелдейді.
«Менің бастамаммен іске қосылған “Ұлттық қор – балаларға” бағдарламасы аясында әрбір бала мемлекет тарапынан қолдау алады. Биылдан бастап “Қазақстан балалары” тұжырымдамасын жүзеге асыру үдерісі басталды. Әділетті әрі прогрессивті Қазақстанда жас ұрпақты қолдау әрдайым мемлекеттік саясаттың басты назарында болады», – деп жазды Президент.
