Астана, 8 қыркүйек. ИНТЕРФАКС-ҚАЗАҚСТАН – Президент Қасым-Жомарт Тоқаев салық ретінде төленген әрбір теңге ел дамуына бағытталып, қоғамға сапалы мемлекеттік қызмет, инфрақұрылым және қолдау шаралары ретінде қайтарылуы қажет екенін мәлімдеді.
«Жаңа Салық кодексі тек нормалар мен рәсімдерді өзгертумен шектелмеуі керек. Ол адалдық пен ашықтыққа негізделген салық төлеушілердің жаңа менталитетін қалыптастыруы тиіс. Мемлекет адал салық төлеушілердің мүддесін қорғай отырып, олардың төлеген салығын елді дамытуға бағыттайды. Әрбір төленген теңге сапалы мемлекеттік қызмет, инфрақұрылым және мемлекеттік қолдау шаралары түрінде қоғамға қайтарылуы керек», – деді Мемлекет басшысы дүйсенбі күні Парламент палаталарының бірлескен отырысында Қазақстан халқына арнаған Жолдауында.
Президенттің айтуынша, азаматтарға көрсетілетін мемлекеттік қызметтерді цифрландыру бағытында едәуір ілгерілеу бар, алайда бизнес үшін бюрократиялық кедергілер әлі де үлкен мәселе болып отыр. Осы себепті цифрландыру өз мақсатына толық жетпей отыр.
«Мұндай жағдайды жедел өзгерту қажет, ең алдымен салықтық әкімшілендіру саласында. Мемлекеттік кірістер комитеті жасанды интеллекттің әлеуетін тиімді пайдалана отырып, мемлекеттік органдар арасында цифрландырудың көшбасшысына айналуы тиіс. Бұл жүйелі шаралар мемлекеттің бизнеске деген түбегейлі жаңа – сервистік қарым-қатынас моделін қалыптастыруға бағытталған», – деді Қасым-Жомарт Тоқаев.
