Астана. 18 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Жапонияға жасаған ресми сапары аясында Токиодағы ең ірі синтоистік ғибадатхана – Мэйдзи дзингу кешеніне барып, Құрметті қонақтар кітабына жазба қалдырды. Бұл туралы бейсенбі күні Мемлекет басшысының баспасөз қызметі хабарлады.
«Мэйдзи дзингу ғибадатханасы – жапон халқы үшін терең тарихи маңызы бар, ұлттық бірегейлік пен бірліктің мызғымас символы. Күншығыс еліне өсіп-өркендеу тілеймін!» – деп жазды Қазақстан Президенті.
1920 жылы салынған кешен императорлық қасиетті орын мәртебесіне ие. Оның аумағында шамамен 120 мыңға жуық ағаш пен бұта өсетін көрікті саябақ орналасқан.
Ғибадатхана император Мэйдзиге арналған. Оның билік еткен кезеңі Жапонияны әлемдегі ең дамыған мемлекеттердің біріне айналдырған ауқымды саяси және әлеуметтік-экономикалық реформалармен ерекшеленді.
