Астана. 3 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев жүк тасымалына арналған авиациялық хабтар саласын дамытудағы өзекті мәселелерді шешуді кешеуілдетіп отырған тиісті министрліктердің жұмысын сынға алды, деп хабарлады Мемлекет басшысының баспасөз қызметі.
Мәліметке сәйкес, сәрсенбі күні Мемлекет басшысы өңірлік жүк авиациялық хабтарын дамыту мәселесі жөнінде кеңес өткізіп, Үкіметке нақты мәселелерді жедел түрде шешуге кірісуді тапсырды.
«Әуежай қызметтері бойынша қолданыстағы тарифтік саясатты қайта қарау мәселесіне ерекше көңіл бөлу қажет. Соңғы 10 жылда бұл тарифтер тек бір рет, биыл ғана көтерілді. Практика көрсеткендей, тарифтерді шектеу инфрақұрылымның тозуына алып келеді. Тарифтерді қайта қарау жағдайды жақсартуға нақты мүмкіндік беруі тиіс», – деді Президент кеңесте.
Сонымен қатар Мемлекет басшысы бағаны күрт өсірмей, теңгерімді тәсіл қалыптастыру қажеттігін атап өтті.
Президенттің пікірінше, «инвестицияға айырбас ретінде тариф» қағидатын енгізу – алдағы жылдардағы саланы дамытудың негізгі шарты болуы қажет.
«Инвесторлардың пікірін мұқият тыңдап, бизнеске қолайлы жағдай жасау – стратегиялық міндет», – деді Тоқаев.
Сонымен бірге Президент әуежайларда авиациялық емес қызметтерді артық реттеудің орынсыз екенін атап өтті.
«Компанияларды іріктеуде күрделі бюрократиялық рәсімдер, конкурстар өткізу арқылы таңдау, келісімшарттардың әрекет ету мерзімін шектеу – мұның барлығын тоқтату қажет», – деді Мемлекет басшысы.
