Астана. 3 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қарулы Күштерде, өзге де әскерлер мен әскери құрылымдарда әскери тәртіп пен құқықтық тәртіпті қамтамасыз ету мәселелері бойынша кеңес өткізді, деп хабарлады Мемлекет басшысының баспасөз қызметі.
Кеңес барысында Бас прокурор Берік Асыловтың, Ішкі істер министрі Ержан Саденовтың және Қорғаныс министрі Даурен Косановтың әскери тәртіпті сақтау, құқықтық тәртіпті қамтамасыз ету және әскери ортада жүргізіліп жатқан тәрбие жұмыстары туралы баяндамалары тыңдалды.
Жиын аясында Қарулы Күштер мен құқық қорғау органдары басшылығының әскердегі құқықбұзушылықтардың алдын алу бағытындағы қызметінің түрлі қырлары талқыланды.
«Президент заңдылық пен құқықтық тәртіпті одан әрі қамтамасыз етуге, армиядағы тәрбие жұмысын жетілдіруге, әскери қызметшілердің қаза табуы мен жарақаттануының алдын алу бойынша қабылданып жатқан шаралардың тиімділігін арттыруға бағытталған бірқатар нақты тапсырма берді», – делінген хабарламада.
