Вашингтон, 19 шілде. ИНТЕРФАКС – АҚШ-тың президенті Дональд Трамп The Wall Street Journal газетінің иесі Руперт Мердок пен бірнеше журналиске жала жапты деген айыппен Майамидегі федералды сотқа шағым түсірді. Бұл туралы CNN телеарнасы хабарлады.
Трамптың заңгерлері News Corp медиахолдингін «журналистік этика мен ақпаратты дәл жеткізу стандарттарын өрескел бұзды» деп айыптап отыр.
Даудың себебі – WSJ-да жарияланған мақалада Трамптың 2003 жылы атышулы кәсіпкер Джеффри Эпштейнге әдепсіз сурет салып, оған қолтаңбасымен сыйға тартқаны айтылған. Алайда газет суретті де, хатты да жарияламаған.
«Бұл хат немесе сурет ешқашан болмаған«, – делінген Трамптың адвокатының сотқа жолдаған құжатында.
Truth Social желісіндегі жазбасында Трамп Руперт Мердокты ескерткені туралы мәлімдеді: «Егер бұл жалған хатты жариялайтын болса, сотқа беремін деп алдын ала ескерткенмін«, – деді ол.
Еске салайық, Джеффри Эпштейн 2019 жылы кәмелетке толмағандарды жезөкшелікке тарту ісі бойынша сотты күтіп жатқанда түрмеде өз-өзіне қол жұмсаған. Көптеген БАҚ Эпштейннің бұрын Трамппен, АҚШ-тың 42-президенті Билл Клинтонмен және Ұлыбритания королі Карл III-тің інісі ханзада Эндрюмен тығыз байланыста болғанын жазған.
