Астана. 29 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қазақстан халқы Ассамблеясын (ҚХА) 2030 жылға дейін дамыту тұжырымдамасын бекітті. Бұл туралы Мемлекет басшысының баспасөз қызметі дүйсенбі күні хабарлады.
«Мемлекет басшысының жарлығымен «Бірлігіміз — әралуандықта» атауымен Қазақстан халқы Ассамблеясын 2030 жылға дейін дамыту тұжырымдамасы бекітілді», – делінген ресми хабарламада.
Баспасөз қызметінің мәліметінше, тұжырымдама қоғамды біріктіру мен жалпыұлттық келісімді қамтамасыз етуге бағытталған жаңа тәсілдер мен қағидаттарды ескере отырып, ҚХА-ны одан әрі дамытуды көздейді.
Қазақстан халқы Ассамблеясы – республикада тұратын барлық этнос өкілдерін біріктіретін консультативтік-кеңесші орган. Бұл құрылымды құру бастамасын 1992 жылы елдің Тұңғыш Президенті Нұрсұлтан Назарбаев көтерген болатын және ол шамамен 30 жыл бойы Ассамблеяның төрағасы қызметін атқарды. 2021 жылғы сәуірде Назарбаев бұл өкілеттігін ел Президенті Қасым-Жомарт Тоқаевқа тапсырды.
ҚХА сессияларында еліміздің даму бағытына қатысты маңызды ұсыныстар мен бастамалар айтылып, кейін олар Мемлекет басшысының жарлықтары мен заңдары арқылы нақты іске асырылады.
