Tengrinews хабарлауынша, Мемлекет басшысы «Қазақстан Республикасының Қылмыстық кодексіне және Қазақстан Республикасының Қылмыстық-процестік кодексіне толықтырулар енгізу туралы» Қазақстан Республикасының Заңына қол қойды. Аталған өзгерістерге сәйкес Қылмыстық кодекске 380-3-бап енгізіліп, медицина қызметкерлеріне және жедел жәрдем бригадаларының жүргізушілеріне қатысты күш қолдану немесе күш қолданамын деп қорқыту үшін қылмыстық жауапкершілік белгіленді. Өмірі мен денсаулығына қауіпті емес күш қолданғаны үшін 500-ден 1000 айлық есептік көрсеткішке дейін (2026 жылы 2,1–4,3 млн теңге) айыппұл салу, сол мөлшерде түзеу жұмыстары, 600 сағатқа дейін қоғамдық жұмыстар, сондай-ақ 2 жылдан 3 жылға дейін бас бостандығын шектеу немесе айыру жазасы көзделген. Ауырлататын мән-жайлар болған жағдайда жаза 3 жылдан 7 жылға дейін бас бостандығын шектеу немесе айыру түрінде күшейтіледі. Өмірі мен денсаулығына қауіпті күш қолдану 5 жылдан 10 жылға дейін бас бостандығынан айырумен жазаланады, ал ауырлататын мән-жайлар болған кезде жаза мерзімі 7 жылдан 12 жылға дейін ұлғаяды. Қылмыстардың құрамын нақты ажырату мақсатында медицина қызметкерлеріне және жедел жәрдем жүргізушілеріне күш қолданамын деп қорқыту үшін жеке жауапкершілік белгіленді. Бұл әрекет үшін 200-ден 500 айлық есептік көрсеткішке дейін (2026 жылы 865 мың – 2,1 млн теңге) айыппұл салу, сол мөлшерде түзеу жұмыстары, 300 сағатқа дейін қоғамдық жұмыстар, не 2 жылға дейін бас бостандығын шектеу немесе айыру қарастырылған. Ауырлататын мән-жайлар болған жағдайда жаза 2 жылдан 3 жылға дейін бас бостандығын шектеу немесе айыруды құрайды.
Евразия24 пікірі:
Бұл жаңалықты «дәл уақытында қабылданған шешім» деуге болады. Қабылданған шаралар, сөзсіз, қатаң сипатқа ие. Алайда елде медицина қызметкерлеріне қатысты жүйелі түрде қайталанып келе жатқан зорлық-зомбылық жағдайы мұндай қадамды әлдеқашан талап еткен еді. Денсаулық сақтау бірінші вице-министрі Тимур Сұлтанғазиев Сенатта өткен брифингте 2019 жылдан бері Қазақстанда медицина қызметкерлеріне қарсы 280 шабуыл тіркелгенін мәлімдеді. Ал 2025 жылы қызметтік міндетін атқару кезінде күш көрсету салдарынан 25 дәрігер, 33 орта медициналық қызметкер және 9 жедел жәрдем жүргізушісі зардап шеккен. Медицина қызметкерлеріне жасалатын шабуылдардың себептері көбіне тұрмыстық сипатта: біреуге кезек ұнамаған, біреуге жол бермеді деп реніш туған, енді бірі медициналық қызметкер пациентке жеткілікті деңгейде ілтипат көрсетпеді деп есептеген. Бұған дейін Денсаулық сақтау министрі Ақмарал Әлназарова да дәрігерлерге қарсы жасалған өрескел зорлық-зомбылық оқиғалары туралы айтқан болатын. Жазаны қатаңдату медицина қызметкерлеріне қол көтеруге бейім азаматтардың әрекетін тежеуге тиіс.
