Иерусалим. 9 ақпан. ИНТЕРФАКС — Израиль Тегеран баллистикалық зымырандар мәселесінде «қызыл сызықтан» өтсе, Иранға өз бетінше соққы беруі мүмкін екенін АҚШ-қа мәлімдеді. Бұл туралы дереккөздерге сілтеме жасаған Jerusalem Post хабарлады.
«Біз америкалық тарапқа Иран баллистикалық зымырандарға қатысты біз белгілеген қызыл сызықтан асатын болса, соққыны беретінімізді айттық», — деді басылымның дереккөзі.
Оның айтуынша, Израиль Иран ішіндегі жағдайдың дамуын тұрақты түрде бақылап отыр.
Басылым атап өткендей, Израиль Қорғаныс министрлігінің өкілдері жуырда америкалық әріптестеріне Иранның баллистикалық зымырандар жасау бағдарламасы елдің өмір сүруіне төнетін қауіп екенін жеткізген.
Қауіпсіздік қызметіндегі дереккөздердің мәліметінше, соңғы апталарда жоғары деңгейдегі бірқатар кездесулер барысында Израильдің Иранның зымырандық әлеуетін және оған қатысты өндірістік инфрақұрылымды жою ниеті туралы хабарланған.
Сондай-ақ дереккөздер Израильдің жақында өткен келіссөздерде Ирандағы зымыран бағдарламасына байланысты қосымша нысандарға соққы беру жоспарларын ұсынғанын айтты.
Осы ретте израильдік ресми тұлғалар АҚШ президенті Дональд Трамптың Йемендегі хуситтерге қарсы Вашингтон жүргізген соңғы операцияларға ұқсас, шектеулі соққы үлгісін таңдауы мүмкін екеніне алаңдаулы.
Әскери шенеунік АҚШ-тың бірнеше нысанға ғана соққы беріп, қалған жауапкершілікті Израильге қалдыруы мүмкін екенін айтты. Оның сөзінше, мұндай әрекет негізгі қатерді жоймайды.
