Liter.kz хабарлайды: «Алматыда курьерге қатысты даулы оқиғадан кейін билік пен бизнес өкілдері қызмет көрсету саласында жаңа талаптарды талқылау және азаматтардың қауіпсіздігін қамтамасыз ету мақсатында кездесу өткізді. Алматы қалалық полиция департаментінің бастығы, генерал-майор Айдын Кабдулдинов жеткізу қызметі нарығының қарқынды дамып келе жатқанын атап өтіп, сонымен бірге азаматтардың қауіпсіздігі басым бағыт болып қалуы тиіс екенін айтты: «Әрбір курьер тұрғын үйлерге, жеке деректерге және адамдардың үйде болуы немесе болмауы жайлы ақпараттан хабардар. Біз жұмыс процесінің барлық кезеңінде курьерлердің биометриялық сәйкестендірілуін, аккаунттарды үшінші тұлғаларға беруге тыйым салынуын, шетелдік жұмыс күшін тартуды шектеуді және жол жүру ережелерінің сақталуына тұрақты бақылау орнатуды талап етеміз». Прокуратура өкілі нарықтың барлық қатысушылары заң талаптарын міндетті түрде сақтауы керектігін және мемлекеттік органдармен ақпарат алмасуды жолға қою қажеттігін атап өтті. Кеңеске қатысушылар курьерлер қызметіне бақылауды күшейту, жылдам жеткізу үшін қауіпсіздікке нұқсан келтіруді болдырмау және қызметкерлердің заңды мәртебесін қамтамасыз ету мәселелерін талқылады. Айдын Кабдулдинов жүйелі өзгерістер болмаған жағдайда полиция тарапынан қосымша нормативтік шаралар қабылдау және агрегаторлардың жауапкершілігін күшейту бастамасы көтерілетінін қоса айтты».
Еуразия24 пікірі:
Алматыда курьерге қатысты үлкен резонанс тудырған оқиға — пәтеріне кіргізген қызға тиіскені үшін 7 тәулікке әкімшілік қамауға алынған гүл жеткізушінің ісі. Осы оқиғадан кейін құқық қорғау органдары жеткізу саласындағы қауіпсіздік мәселесіне ден қойып, бизнес субъектілерінен өз курьерлеріне қатысты бақылауды күшейтуді талап еткені орынды әрі уақытылы шешім болып отыр. Биометриялық тіркеуді енгізу курьерлердің жеке басын үшінші тұлғалар пайдалануының алдын алуға және тәртіп бұзған адамды нақты анықтауға мүмкіндік береді. Алайда қазір көптеген ірі сауда және қоғамдық тамақтандыру желілері танымал агрегаторлардан бөлек, өздерінің жеке жеткізу қызметін пайдаланады. Мұндай құрылымдарда курьерлермен қарым-қатынас басқа қағидалар бойынша қалыптасады. Бұл жағдайда қызметкерлердің жауапкершілігі мен заңға сай әрекет етуі тікелей сол компаниялардың ішкі талаптарына байланысты. Дегенмен жеткізу қызметіндегі еңбекақы деңгейі төмен әрі талаптары жоғары емес жағдайларда кадрларды іріктеу тәсілдері жақын уақытта түбегейлі өзгереді деу қиын.
