Астана. 21 сәуір. ИНТЕРФАКС-ҚАЗАҚСТАН – Қасым-Жомарт Тоқаев Перумен қылмыстық-құқықтық саладағы үш халықаралық шартты ратификациялау туралы заңдарға қол қойды. Бұл туралы Мемлекет басшысының баспасөз қызметі хабарлады.
Атап айтқанда, 2024 жылғы 23 қазанда Астанада қол қойылған Қазақстан мен Перуарасындағы қылмыстық істер бойынша өзара құқықтық көмек туралы шарт ратификацияланды. Құжаттың негізгі мақсаты – қылмыстың алдын алу, оны тергеу, қылмыстық қудалау және жолын кесу бағытында тараптардың өзара іс-қимылы арқылы тиімділікті арттыру.
Өзара құқықтық көмек ақпарат алмасуды, тұлғаларды анықтауды, іздестіру шараларын жүргізуді, тінту мен жауап алуды, сараптамалар жүргізуді, дәлелдемелер ұсынуды және тараптардың ұлттық заңнамаларында көзделген өзге де көмек түрлерін қамтиды.
Сонымен қатар Қазақстан Республикасы мен Перу Республикасы арасындағы сотталған адамдарды беру туралы шарт та ратификацияланды. Бұл құжат 2024 жылғы 23 қазанда Астанада қол қойылған және бас бостандығынан айыру жазасына сотталған тұлғаларды өз азаматтығы бар мемлекетте жазасын өтеу үшін беру тәртібі мен шарттарын айқындауға бағытталған.
Аталған келісімге сәйкес, бір тараптың аумағында сотталған адам тағайындалған жазасын өтеу үшін екінші тараптың аумағына берілуі мүмкін.
Бұдан бөлек, Мемлекет басшысы Қазақстан Республикасы мен Перу Республикасы арасындағы экстрадиция туралы шартты ратификациялау туралы заңға қол қойды. Құжат 2024 жылғы 23 қазанда Астанада қабылданған және қылмыстық жауапкершілікке тарту немесе заңды күшіне енген сот үкімін орындау мақсатында іздеуде жүрген тұлғаларды беру мәселелері бойынша ынтымақтастықты дамытуға бағытталған.
Шартта экстрадициялау үшін негіздер мен одан бас тарту жағдайлары нақты айқындалған. Негізгі талаптардың бірі – кемінде бір жыл мерзімге бас бостандығынан айыру жазасы немесе одан да қатаң жаза көзделген қылмыстың жасалуы.
Сондай-ақ, егер сұрау салынған құқық бұзушылық саяси сипатта деп танылса немесе тұлғаны нәсіліне, дініне, ұлтына және өзге де белгілеріне байланысты қудалау мақсатында экстрадициялау сұралса, мұндай беру жүзеге асырылмайды.
