Астана. 5 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Қазақстан Республикасы мен Тәжікстан Республикасы арасындағы одақтастық қатынастар туралы шартты ратификациялау туралы» Заңға қол қойды, деп хабарлады Мемлекет басшысының баспасөз қызметі.
Сенаттың Халықаралық қатынастар, қорғаныс және қауіпсіздік комитетінің қорытындысында атап өтілгендей, Қазақстан мен Тәжікстан арасындағы одақтастық қатынастар туралы шартқа 2024 жылғы 22 тамызда Душанбе қаласында қол қойылған және ол қазақ-тәжік ынтымақтастығын кешенді дамытуға қосымша серпін беруге бағытталған.
Құжат саяси, әскери, сауда-экономикалық, ауыл шаруашылығы, көлік-транзит, азық-түлік, өнеркәсіп, су-энергетика, экология, цифрлық, білім беру, мәдени-гуманитарлық салалардағы ықпалдастықты және өңіраралық интеграцияны кеңейтуді көздейді. Шарт нормаларына сәйкес, тараптар өңірлік қауіпсіздікті қамтамасыз ету мақсатында Орталық Азиядағы сын-қатерлер мен қауіптерге қарсы іс-қимыл мәселелері бойынша өзара іс-қимылды, сондай-ақ әскери және әскери-техникалық салалардағы байланыстарды, соның ішінде жедел және жауынгерлік дайындық бойынша бірлескен іс-шаралар өткізу, кадрлар мен мамандардың әлеуетін арттыру мәселелерінде нығайта түседі. Кәсіпкерлік және өзге де экономикалық қызмет үшін қолайлы жағдайлар жасауға бағытталған сауда-экономикалық өзара іс-қимылға ерекше назар аударылады.
Құжаттағы маңызды аспектілердің бірі – өңірдегі барлық елдердің мүдделерін ескере отырып, Орталық Азиядағы мемлекетаралық қайнар көздердің су ресурстарын ұтымды әрі өзара тиімді пайдалану және қорғау үшін ынтымақтастықты дамыту болып табылады. Сонымен қатар құжат парламентаралық достық топтарының қызметі аясында Қазақстан мен Тәжікстан арасындағы парламентаралық байланыстарды нығайтуға ықпал етеді.
