ҚР Ұлттық Банкі хабарлайды: «Ұлттық Банк төрағасының орынбасары Виталий Тутушкин Қырғызстанның ШЫҰ Мемлекет басшылары кеңесіне төрағалығы шеңберінде ұйымдастырылған басқосуға қатысты. Ол Алматыдағы тұрақты өкілдіктің басшысы қызметін де қоса атқарады. Кездесу барысында қатысушылар ШЫҰ шеңберінде халықаралық қаржы жүйесін дамытудың өзекті мәселелерін, мемлекеттік қаржыны цифрландыруды, ағымдағы ақша-кредит саясатын және қаржылық тұрақтылықты қамтамасыз ету шараларын талқылады. Қазақстан Ұлттық Банкі елдегі макроэкономикалық жағдайды баяндап, инфляцияны тежеу бойынша қабылданып жатқан шаралармен бөлісті. Іс-шараға Қазақстан, Беларусь, Иран, Үндістан, Қытай, Қырғызстан, Пәкістан, Ресей Федерациясы, Тәжікстан, Өзбекстан өкілдері, сондай-ақ Ұйым Бас хатшысының орынбасары қатысты».
Еуразия24 пікірі:
Қазақстанның Ұлттық Банкі бұл жерде тым қарапайымдылық танытып отырған сияқты. Өйткені Бішкектегі басқосуда ШЫҰ-ға мүше елдердің қаржы-экономика блогының шенеуніктері тек инфляция мен ақша-кредит саясатын ғана емес, бұдан әлдеқайда ауқымды мәселелерді сөз етті. Оның ішінде ұйым ішіндегі халықаралық қаржы жүйесін дамыту, өңірлік қаржылық инфрақұрылымды нығайту, тіпті ШЫҰ Даму банкін құру идеясы да бар. Мәселен, қырғызстандық ақпарат көздерінің хабарлауынша, «ШЫҰ мүшелері ұйымның қаржылық инфрақұрылымын жетілдіру жұмыстарын жалғастыруды және ШЫҰ Даму банкін құруға қатысты кеңестердің алға жылжығанын атап өткен». Бұл бастаманың талқыланып жатқанына бірнеше жылдың жүзі болды, бірақ дәл қазір бұл жобаның сұлбасы нақтылана бастағандай. Бұл өте дер кезінде көтерілген мәселе, өйткені ШЫҰ — жер шары халқының тең жартысын және әлемдік экономиканың қомақты бөлігін құрайтын елдердің басын қосып отырса да, ұйымның әлі күнге дейін өз ішінде дербес ірі қаржылық тетігі жоқ.
