ҚР Су ресурстары және ирригация министрлігі хабарлайды: «Су ресурстары және ирригация министрі Нұржан Нұржігітов БҰҰ Университетінің Су ресурстары, қоршаған орта және денсаулық сақтау институтының (UNU-INWEH) директоры Каве Маданимен кездесті. Тараптар су саясаты мен су дипломатиясы саласындағы ынтымақтастықты дамыту мәселелерін, сондай-ақ Тараз қаласындағы Қазақ ұлттық су шаруашылығы және ирригация университетінің базасында UNU-INWEH хабын ашу мүмкіндігін талқылады. Бұдан бөлек, су саласын цифрландыру және ағымдағы жылдың желтоқсан айында өтетін БҰҰ-ның Су ресурстары жөніндегі конференциясына дайындық мәселелері қаралды. Кездесу қорытындысы бойынша Нұржан Нұржігітов профессор Маданиді ҚазҰСШИУ-дің Халықаралық консультативтік кеңесінің құрамына кіруге шақырды. «Мемлекет басшысы бізге су шаруашылығы саласының кадрлық және ғылыми әлеуетін арттыру бойынша міндет жүктеді. Осы мақсатта кешенді шаралар қабылдануда. Халықаралық тәжірибені зерделеуге және шетелдік серіктестерімізбен бірлескен білім беру бағдарламаларын әзірлеуге ерекше көңіл бөлінуде. БҰҰ Университеті хабының Қазақстанда ашылуы бұл бағыттағы маңызды қадам болуы мүмкін», — деп атап өтті су ресурстары және ирригация министрі Нұржан Нұржігітов».
Еуразия24 пікірі:
Қазақстанның БҰҰ-ның UNU-INWEH университетімен байланыс орната алуы — үлкен жетістік! Өйткені бұл жай ғана ғылыми орталық емес, іс жүзінде БҰҰ жүйесіндегі негізгі су аналитикалық институты, яғни «БҰҰ-ның су жөніндегі бас орталығы» болып табылады. Ол зерттеулермен, кадрлар даярлаумен, су дипломатиясымен, климаттық тәуекелдермен, трансшекаралық сулармен және ресурстарды басқарудың цифрлық технологияларымен айналысады. Су мен білікті кадрлардың тапшылығын қатты сезініп отырған Қазақстан үшін UNU-INWEH-пен серіктестік орнатудың маңызы ерекше. Мұндағы әңгіме тек ел ішіндегі су шаруашылығын басқаратын инженерлерді дайындау туралы ғана емес, ең алдымен, тағдырымыз тікелей байланысты болып отырған трансшекаралық өзендерді бөлісу келіссөздерінде ел мүддесін қорғайтын «су дипломаттарының» негізгі құрамын қалыптастыру жайында болып отыр. Егер БҰҰ Университетінің хабы шынымен де Таразда ашылатын болса, Қазақстан уақыт өте келе халықаралық сараптаманы тек сырттан тұтынушы ғана емес, оны бүкіл аймақ үшін өндіретін негізгі алаңға айналады. Ал бұл — Орталық Азиядағы су құзыреттілігі бойынша өңірлік көшбасшылыққа түсетін даңғыл жол. Бұл халықаралық мәртебенің мүлдем жаңа, жоғары деңгейі екенімен келісетін шығарсыз?
