Астана. 3 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Кипр Президенті Никос Христодулидиске І дәрежелі «Достық» орденін табыстады. Бұл туралы Мемлекет басшысының баспасөз қызметі хабарлады.
Қасым-Жомарт Тоқаев Кипр Президентінің Қазақстанға жасаған алғашқы тарихи сапары екіжақты ынтымақтастықты дамытудағы маңызды кезең екенін атап өтіп, Никос Христодулидистің Қазақстан мен Кипр арасындағы қатынастарды нығайтуға қосқан жеке үлесін жоғары бағалады.
«Қазақстан мен Кипр арасындағы ынтымақтастықты дамытуға қосқан елеулі үлесіңізді ескере отырып, Сізді І дәрежелі «Достық» орденімен марапаттау туралы шешім қабылдадым. Бұл марапаттың атауының өзі – «достық» деген мағынаны білдіреді және Қазақстанның Сіздің еліңізбен қарым-қатынасының негізін құрайтын сенім мен серіктестік рухын айшықтайды. Сізге жауапты мемлекеттік қызметіңізде толағай табыстар, сондай-ақ достас Кипр халқының игілігі мен өркендеуі жолындағы жаңа жетістіктер тілеймін», – деді Мемлекет басшысы.
Өз кезегінде Никос Христодулидис жоғары мемлекеттік награда үшін ризашылығын білдірді.
«Кипр халқының атынан бұл марапатты қабылдау мен үшін үлкен мәртебе. Ол екі ел арасындағы достықтың айқын белгісі болып табылады. Бүгінгі сапарымыз өзара қызығушылық тудыратын салалардағы ынтымақтастықты одан әрі тереңдетуге деген ортақ ұмтылысымыз бен берік саяси ерік-жігерімізді көрсетеді», – деді Кипр Президенті.
