Астана. 3 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Еңбек заңнамасын жетілдіру мәселелері бойынша кейбір заңнамалық актілерге өзгерістер мен толықтырулар енгізу туралы» заңға қол қойды.
Сенаттың Әлеуметтік-мәдени даму және ғылым комитетінің қорытындысында атап өтілгендей, заңның мақсаты – қызметкерлердің құқықтарын қорғау кепілдіктерін күшейту, әлеуметтік әріптестікті дамыту, еңбек қауіпсіздігі стандарттарын арттыру және еңбек қатынастарының негізгі рәсімдерін нақтылау арқылы еңбек заңнамасын одан әрі жетілдіру.
Құжат аясында Қазақстан Республикасының Еңбек кодексіне, «Халық денсаулығы және денсаулық сақтау жүйесі туралы» кодекске және «Қазақстан Республикасындағы жергілікті мемлекеттік басқару және өзін-өзі басқару туралы» заңға өзгерістер мен толықтырулар енгізіледі.
Еңбек кодексі уақытша еңбекке жарамсыздық кезеңімен немесе әлеуметтік демалыс кезеңімен сәйкес келген жағдайда соңғы жұмыс күнін айқындау тәртібін нақтылайтын нормалармен толықтырылады.
Заңда ауысым алдындағы міндетті медициналық куәландырудан өтуге жұмсалған уақытқа ақы төлеу қарастырылған. Оның мөлшері ұжымдық шартпен немесе жұмыс берушінің актісімен белгіленеді.
Сонымен қатар жұмыс берушінің еңбек жағдайларының өзгеруі туралы қызметкерді жазбаша түрде хабардар ету міндеті енгізіледі. Сондай-ақ материалдық жауапкершілігі бар қызметкерлер үшін еңбек шартын қызметкердің бастамасымен бұзу тәртібі, еңбек қатынастарының тоқтатылатын күні және жұмыс берушінің мүлкі мен құжаттарын қабылдап-тапсыру рәсімдерін аяқтау шарттары реттеледі.
«Халық денсаулығы және денсаулық сақтау жүйесі туралы» кодекс қызметкер тіркелген медициналық ұйымға цифрлық технологиялар арқылы скринингтік тексерулерден өту қажеттілігі туралы хабарлама жіберу құзыретін беретін нормалармен толықтырылады.
Ал «Қазақстан Республикасындағы жергілікті мемлекеттік басқару және өзін-өзі басқару туралы» заңға жергілікті атқарушы органдардың еңбек, еңбек қауіпсіздігі және еңбекті қорғау саласындағы мемлекеттік саясаттың іске асырылуын қамтамасыз ету міндеттерін бекітетін толықтырулар енгізіледі.
Сондай-ақ заң жұмыс берушілерге өндірістік процесте тікелей пайдаланылатын барлық негізгі құралдарды, соның ішінде ғимараттарды, жабдықтарды, көлік құралдарын және өзге де еңбек құралдарын қолданыстағы қауіпсіздік талаптары мен нормаларына сәйкестендіру міндетін жүктейді.
