Астана. 3 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Кипрмен 2028 жылға дейінгі экономикалық ынтымақтастықтың жол картасын әзірлеуді ұсынды. Бұл туралы Мемлекет басшысының баспасөз қызметі Кипр Президенті Никос Христодулидиспен өткен келіссөздердің қорытындысы бойынша хабарлады.
Хабарламаға сәйкес, келіссөздер барысында Қасым-Жомарт Тоқаев екі ел үкіметтерінің нәтижелі экономикалық күн тәртібін қалыптастыру мақсатында күш-жігерін үйлестірудің маңыздылығын атап өтті.
Осыған байланысты Қазақстан Президенті экономикалық ынтымақтастық жөніндегі үкіметаралық комиссия мен Іскерлік кеңес құру, сондай-ақ сауда делегацияларының тұрақты алмасуын ұйымдастыру бастамасын көтерді.
Тараптар сауда және инвестициялар, көлік пен логистика, цифрлық коммуникациялар мен жасанды интеллект, сондай-ақ қаржы салаларындағы өзара іс-қимылды кеңейту перспективаларын талқылады.
Кипр Президенті Қазақстанды Еуропалық Одақтың стратегиялық серіктесі ретінде қарастыратынын мәлімдеп, бірқатар бағыттар бойынша ынтымақтастықты дамыту әлеуетінің жоғары екенін атап өтті.
«Қазақстан – Еуропалық Одақтың стратегиялық серіктесі. Еуропалық Одаққа мүше мемлекет ретінде Кипр қазақстандық инвесторлар мен компаниялар үшін Еуропа нарығына шығатын сенімді қақпа бола алады», – деді Никос Христодулидис.
Оның айтуынша, ақпараттық-коммуникациялық технологиялар, финтех, инвестициялық қорлар, кеме қатынасы, туризм, білім беру, жаңартылатын энергетика және инфрақұрылым салалары ынтымақтастықтың перспективалы бағыттары болып саналады.
Кипр Президенті сондай-ақ Астана халықаралық қаржы орталығымен өзара іс-қимылды кеңейту мүмкіндігіне тоқталып, қаржылық қызметтер мен «жасыл» қаржыландыру бағыттарындағы әріптестіктің әлеуетін атап өтті.
Бұдан бөлек, тараптар мәдениет, білім беру, спорт және туризм салаларындағы ынтымақтастықты одан әрі дамыту мүмкіндіктерін де талқылады.
